Санкт-Петербургтен жеткен суреттер

Жуырда елордадағы Тұңғыш Президент музейінде Санкт-Петербург концерттік хорының (Смольный соборының камералық хоры) бағдарламасы аясында «Жаңа көз­қарас. New Vision» фотосуреттер көрмесінің ашылу рәсімі өтті. Көрмені Қазақстан Республикасы Тұңғыш Прези­денті музейінің директоры Алма Сағынғали ашып берді. Содан соң Ресейдің халық әртісі, «Исаакий соборы» мемлекеттік ескерткіш-музейінің директоры Николай Буров сөз алып, Қазақстан мен Ресей арасындағы мәдени-гуманитарлық ынтымақтастықтың нығая түсетініне сенімі зор екендігін, сондай-ақ құр қол келмей, Астана тұр­ғындарына көрме ала келгендерін айтып, музей қыз­меткерлеріне ризашылығын білдірді. Жиында атақты хор ұжымдарының бірі – Санкт-Петербург концерттік хоры өнер көрсетті. Хор 1991 жы­лы құрылған екен. Байқағанымыздай, аталған хордың во­калдық орындау мәнерінде еуропалық жеңіл дауыс ырғағы мен нағыз орыс халқына тән дауыс тембрі әдемі үйлесім тапқан. Бұл жолы біз Санкт-Петербургте бол­масақ та, өзімізді сол бір ғажап қаланың тұрғынындай елестеттік. Өйткені, музейге қойылған «New Vision» фотосуреттер көрмесі өте әсерлі және шынайы шыққан. Көпшілік назарына ұсынылған тамаша суреттер келген қонақтардың ерекше таңданысын туғызбай қоймады. Осы жоба барысында қала тұрғындары мен қонақтары Санкт-Петербургті жа­ңа қырынан танып, қаланың заманауи тынысын және клас­­сикалық дәстүрлер көркемдігіне бай өмір ырғағымен жақынырақ танысуына мүмкіндік алды. Мұндағы түпкі мақсат – Санкт-Петер­бургке және қаланың көрікті жерлеріне, сондай-ақ, бірегей тарихи-көркемдік кешен – төрт собор музейі: Исаакий соборы, Христостың қайта арылу ғибадатханасы («Спас на крови»), Смольный соборы, Сампсониев соборларына деген жас фотосуретшілердің өзіндік көзқарасын көрсету болса, сол мақсат орындалды деп білдік. Раушан ТӘУІРХАНҚЫЗЫ, «Егемен Қазақстан»