АСТАНА. 21 мамыр. Кеше Қазақстан бас прокуроры Жақып Асановтың төрағалық етуімен Бас прокуратура жанындағы заңдылықты қамтамасыз ету жөніндегі консультативті кеңестің отырысы болып өтті. Бұл туралы Бас прокуратураның баспасөз қызметі дерегіне сүйенген egemen.kz тілшісі хабарлады.
Кеңес барысында бас прокурор жер мәселесі жөнінде ресми үндеу жариялады.
Жақып Асанов өз сөзінде көпшілікті арандатушылардың аранына түсіп қалмауға шақырды, рұқсатсыз көшеге шыққандардың қылмыстық жауапкершілікке дейін тартылатынын ескертті.
Бас прокурор жер дауын көшеде емес, үстел басында шешуге мемлекет бар жағдайды жасап отырғанын атап өтті. Үкімет жанынан арнайы комиссия құрылып, ол қазіргі күндері Жер кодексінің олқы жақтарын жан-жақты талқыға салып жатыр. Бірақ, соған қарамастан, тұрғындарды қарсылық акциясына шақырып, арандатып жүргендер көп. Сондықтан, ішкі істер министрлігі әлеуметтік желілердегі күдікті деген азаматтарды ұдайы бақылауға алған. Жұртқа кезекті рет үндеуін арнаған бас прокурор шеру ұйымдастырғандар мен оған қатысқандардың жауапқа тартылатынын, тіпті қылмыстық іс қозғалуы мүмкін екенін ескертті.
«Қазақстан Республикасы Президентінің 2016 жылғы 6 мамырдағы Жарлығымен Жер кодексінің кейбір нормаларын қолдануға мораторий жарияланды, - деді бас прокурор өз сөзінде. - Мемлекет басшысының тапсырмасымен Жер реформасы бойынша комиссия құрылды. Оның құрамына азаматтық қоғам институттарының басшылары мен белсенділері кірді. Азаматтар комиссия жұмысына өңірлерде құрылған қоғамдық кеңестер арқылы да қатыса алады. Комиссия отырысында пікір алмасу барынша ашық. Оның қызметі ақпарат құралдарында тұрақты жариялануда. Арнайы ашылған jerturaly.kz сайтында қазақстандықтар өз сұрақтарын комиссияға қойып, ұсыныс-тілектерін бере алады».
Бас прокурор жер мәселесі бойынша кез-келген пікір білдіру үшін барлық жағдай жасалғанын атап өтті. Алайда, кейбір адамдар осындай жағдай мен заң талаптарын елемей, ортақ диалогтан қашып, халықты заңсыз қарсылық акцияларына шақырғанын қоятын емес. Әлеуметтік, ұлтаралық араздықты қоздыру үшін жалған ақпарат әдейі таратылуда. Мұндай әрекеттер Қазақстан Республикасының заңдарына қайшы келеді.
«Осыған байланысты қоғамдық тұрақтылықты сақтау үшін ел азаматтарын мұндай арандатуға бой бермеуге, азаматтық ұстаным мен жауапкершілік танытуға шақырамын. «Прокуратура туралы» Заңның 25-2 бабын басшылыққа алып, заңсыз митингке шақыру, оны ұйымдастыру, тіпті оған қатысудың өзі әкімшілік немесе қылмыстық жауапкершілікке әкеп соғатынын ескертемін», - деді бас прокурор.
Талғат Райымбек.
Дерек, фото: Қазақстан Республикасы Бас прокуратурасының баспасөз қызметі.
