Ақтөбеде ауыл жастарының слеті өтті

АҚТӨБЕ. 25 мамыр. Ақтөбеде "Жастар - ауыл ресурсы" І шекаралық ауыл жастары слеті өтті. Бұл туралы egemen.kz тілшісі хабарлады. Оған еліміздің іргелес жатқан Ақтөбе, Атырау, Батыс Қазақстан, Қостанай, Қызылорда, Маңғыстау облыстарынан, Ресей Федерациясының Башқұртстан Республикасы мен Орынбор облысынан ауыл жастары қозғалыстарының көшбасшылары қатысты. Шара қонақтарының қатарында Нидерландыдан келген саяхатшылар да болды. Ауыл жастарының алқалы жиынына облыс әкімі Бердібек Сапарбаев қатысып, слетке қатысушыларға құттықтау сөз арнады. Өңір басшысы кез келген мемлекеттің тірегі жастар екенін, сондықтан жастарға үлкен үміт артылатынын мәлімдеді. Мұндай кездесулердің олардың ой-өрісін кеңейтуге, азамат болып қалыптасуларына пайдасы зор екеніне тоқталды. Өткізіліп жатқан шараның маңызы туралы «Жасыл ел» жастар еңбек тобы республикалық штабының жетекшісі Рахат Хамидуллин әсерлі баяндады. Орынбор облысы жастар саясаты департаментінің өкілі Сергей Тужников ақтөбелік жастармен бұрыннан тығыз байланыс бар екенін айта келіп, жастар саясатын жүзеге асыруда ақтөбеліктерде үлгі аларлық үлкен тәжірибе бар екенін де жасырмады. «Ауыл шаруашылығын қаржылай қолдау қоры» АҚ облыстық филиалының дректоры Гүлжанат Ерғазина өңірде «Дипломмен ауылға» жобасын жүзеге асыру бағытындағы жұмыстармен таныстырды және жастар кәсіпкерлігін дамыту туралы ойларын ортаға салды.  Слет барысында ауыл жастары арасынан шаруалар мен бизнесмендердің, жастар ұйымдары көшбасшыларының жобалары таныстырылды. Шара барысында, сонымен бірге, республикалық «Гүлдене бер, туған ел!» марафон-эстафетасы акциясы және бейресми пікірталас алаңдары ұйымдастырылды. Сатыбалды Сәуірбай. Дерек, фото: egemen.kz