Оңтүстікте құс фабрикасында 70 жұмыс орны ашылады

ШЫМКЕНТ. 25 мамыр. Оңтүстік Қазақстан облысында стратегиялық маңызы бар екі ірі жобаны іске асыру жоспарланып отыр. Бұл туралы Арыс қаласының әкімі Сейіт Ертайдың ақпары бойынша еgemen.кz тілшісі хабарлады. Қала әкімі стратегиялық маңызы бар жобалардың құрылысына 13,5 млрд. теңгенің жұмсалатынын айтты. Cолардың бірі – «Ордабасы құс» ЖШС-нің құны 2,5 млрд. теңге болатын, жылына 1,8 млн. бас асыл тұқымды жұмыртқа өндіретін құс фабрикасы. Қазіргі таңда жобаның тиісті құжаттары дайындалып, топографиялық және геодезиялық жұмыстары жүргізілуде. Құс фабрикасы өз жұмысын бастағанда 70 адам жұмыспен қамтылатын болады. Ал екінші жоба негізінде «KAZ GREEN TEK SOLAR» ЖШС-нің баламалы электр энергиясын өндіру жоспары қолға алынып отыр. Құны 11 млрд. теңге болатын күн сәулелік электростансасының құрылысын бастау үшін Арыс қаласы аумағында 30 гектар жер телімі бөлінген. Осылайша, электр қуаты 3 мВт болатын стансада жаңадан 30 жұмыс орны ашылады. Бақтияр Тайжан. Дерек, фото: egemen.kz