27 Мамыр, 2016

Лауреаттармен болған ашық әңгіме

192 рет
көрсетілді
4 мин
оқу үшін
26-05-05Елбасы Нұрсұлтан Назарбаев Нобель сыйлығының лауреаттарымен және халықаралық ұйымдардың басшыларымен кездесті, деп хабарлады Президенттің баспасөз қызметі. Кездесуге Нобель сыйлы­ғының лауреаттары Т.Сарджент, К.Писсаридес және Э.Прескотт, Еуропа Қайта құру және даму банкінің президенті С.Чакрабарти, экономист, АҚШ Президенті Р.Рейганның және Ұлыбритания Премьер-министрі М.Тэтчердің бұрынғы кеңесшісі А.Лаффер, Колумбия университеті Жер инс­титутының директоры Д.Сакс, Массачусетс технология инс­титутының экономика профессоры Д.Аджемоглу, Кембридж университетінің экономика профессоры Чанг Ха-Джун, экономист Хунбин Сун, «Boston Consulting Group» директорлар кеңесінің төрағасы Х.-П.Бюркнер, JP Morgan Chase International директорлар кеңесінің төрағасы Д.Френкель қатысты. Мемлекет басшысы мұнай, газ және басқа да табиғи ресурс­тардың жоғары  бағасы өткен күннің еншісінде қалып бара жатқанын айтты. – Қазақстан сияқты мемлекет үшін бұл – зор сын-қатер. Мұндай ахуал дамудың балама жолдарын іздеуге мәжбүрлейтіндіктен, мұның оңды тұсы да бар. Ешбір ел мұнай мен газ есебінен ғана жоғары деңгейде қала алған жоқ. Бізге экономикамызды әртараптандыру үшін қаражаттың қажетті көлемін жинақтау керек болды, біз солай істедік. Ал соңғы алты жыл бойында біз өңдеуші өнеркәсіптің үлесін арттыру үшін елді индустрияландыру ісін белсене жүргізіп жатырмыз, – деді Нұрсұлтан Назарбаев. Қазақстан Президенті ж­аһан­­дық дамудағы қарқынды өз­герістерге назар аударды. – Бүгінде әлемдік капиталдың ширек бөлігін «сандық» экономика құрайды, «жасыл» технологиялар үдетіле түсуде. Әлемде іштен жану қозғалтқышының заманы өтіп бара жатқаны туралы айта бастады, электромобильдер сатып алушылардың қатары қарқынды түрде артып келеді. Осындай ауқымды өзгерістер нақты шындыққа айналып, адамдардың қиялына қозғау салуда. Ақпараттық тең­сіздік ұлғаюда, дүниенің бір мүйісінде сандық нейрохирургия қалыптастыру туралы ойластырып жатқанда, екінші мүйісіндегі адамдар әлі компьютерді де көрген жоқ, – деді Мемлекет басшысы. Нұрсұлтан Назарбаев жаһан­дық экономика жағымсыз геосаяси ықпалдардың қысымына ұшырап жатқанын да айтты. – Бұлардың қатарына әскери қимылдарды, босқындар легін, террорлық актілерді, санкциялық текетірестерді қосуға болады. Бұл ретте жаңа экономикалық жағдай сын-қатерлермен бірге мүмкіндіктер көзіне де жол ашады. Кім пайдалана білсе, сол ұтады, – деді Қазақстан Президенті. Мемлекет басшысы жаһан­дық дамудың қазіргі сатысында әлемдік деңгейдегі сарапшылардың пікірінің айрықша мәні бар екенін айтты. – Бүгінде халықаралық аренадағы өзара сенім жоғалып барады, бұл – тепе-теңдік үшін қауіпті үрдіс. Осының бәрі қақтығыс қатеріне әкелуі мүмкін. Сондықтан мен БҰҰ мінбері­нен барлық елді қақтығыссыз әлем қалыптастыруға күш жұмылдыруға шақырдым. Біз­дің міндетіміз – жер бетінде орнықты әрі тұрақты дамуды қамтамасыз ету, прогресс үшін озық шешімдер әзірлеу. Дағдарыс – өзгерістер кезеңі. Адамзат ортақ күш-жігер мен пікір алмасулар арқылы бұл жағдайдан шығудың шешімін табатынына сенімдімін. Бұған төртінші индустриялық революция арқылы, 15-20 жылдан кейін әлемді өзгертетін мүлде жаңа технологияларды енгізу арқылы қол жеткізілуі мүмкін, – деді Нұрсұлтан Назарбаев. Кездесуге қатысушылар жаһан­дық саяси және эко­но­­микалық дамуға, ақша-валюта жүйе­сінің перспективаларына қатыс­ты көзқарастарын білдіріп, халық­аралық күн тәртібіндегі өзекті мәселелерді шешуге байланыс­ты өз ойларын ортаға салды. Олар біздің елде жүзеге асырылып жатқан, Қазақстанды жан-жақты дамытуға ықпал етуі тиіс реформаларға қатысты алған әсерлерін де айтып берді.