Винченцо Нибали - «Джиро д’ Италия» жеңімпазы

«Астана» велокомандасының капитаны Винченцо Нибали жексенбі күні «Джиро д’Италия» көпкүндігінің жеңімпазы атанды. Осы арқылы ол Халықаралық велосипедшілер одағының Әлемдік туры рейтингісінде 4-ші сатыға көтерілді. Қазақстан велошабандоз­дары­ның лидері бұрнағы күні жарыстың соңғы кезеңін 6-шы болып аяқ­тағанымен, соның алдындағы 20-шы кезеңдегі алға суырылып шыққандағы артық­шылығын сақтап қалды. Бұл оны жеңіске жеткізді. Осының нәти­жесінде әлемдік рейтингіде 231 ұпай­мен 42 саты ілгері жылжып, 46-орыннан 4-орынға бір-ақ секірді. Италияның таулы-тасты жондарымен жортуда Нибали шапқан үстіне өрледі. Оның қарқыны мәре сызығы жақындаған сайын арта түсті. Жарыстың 20-шы кезеңінен кейін көш тізгінін қолына тигізгесін, сол үздік көр­сеткішінен айырыла қоймады. Велошабандоз бұған дейінгі кезеңдерде көш бастап келе жатқан Orica GreenEDGE командасының спортшысы Эстебан Чавесті 52 се­кундқа артқа тас­тап кетті. Ал, жарыстың 20-шы ке­зеңінде «Катюша» командасының велошабандозы Рейн Таарамяэ жеңіске жетті. Екінші орында Дарвин Атапума (BMC Racing), үшінші болып АҚШ спортшысы Джозеф Домбровски (Cannondale) келді. Аталған көпкүндіктің соңғы сайысы дәстүр бойынша «достық кезеңі» деп аталып, барлық велоспортшылар мәре сызығын бірге кесіп өтті. Сондықтан Нибали «Джиро д’Италия» гранд-турының 2016 жылғы жеңімпаз болды. Тегі италиялық велошабандоз өзінің спортшылық мансабында осымен екінші рет «Джироның» жеңімпазы болып отыр. Бұған дейін ол 2013 жылы осы көпкүндікте алдына жан салмап еді. Ал 2014 жылы «Тур де Франсты» ұтты. Осының арқасында «Тур де Франс», «Джиро д’Италия» және «Вуэльта Испания» атты үш Гранд-турда да жеңіске жеткен тарихтағы алтыншы велошабандоз атанды. Ал 2015 жылы Италия біріншілігінде екі рет топ жарды. Ол сол чемпионатта Леньяно мен Суперга тауларының арасындағы 219 шақырымды алғашқы болып бағындырды. Сондай-ақ, осы жылдың ақпан айында өткен «Оман туры» велокөпкүндігінде 130 шақырымды 2:25:25 жүріп өтіп, жарыс қорытындысы бойынша жеңімпаз болды. Енді Винченцо Нибали жайлы қысқаша тоқталып өтсек, ол 1984 жылы Италияның Мессина қаласында туған. «Акула» деген лақап атқа ие спортшы. 2013 жылдан бері «Астана» вело­ко­мандасының сапында өнер көр­сетіп келеді. Талғат РАЙЫМБЕК, «Егемен Қазақстан»