Жоғарғы Соттың 30 судьясы – университет түлегі

Бұл туралы Қазақстан Республикасы Жоғарғы Сотының Төрағасы Қайрат Мәми әл-Фараби атындағы Қазақ ұлттық университетінде өткен дәстүрлі «Түлектер күні» іс-шарасында айтып өтті. Кездесу барысында ҚазҰУ түлектері қауымдастығының президенті Қайрат Мәми сот жүйесі Ұлт Жоспарында белгіленген барлық 11 тармақты уақтылы және сапалы жүзеге асырғандығын, сондай-ақ, 2016 жылғы 1 қаңтардан бастап еліміздегі соттар жаңа үш сатылы жүйеде жұмыс жүргізе бастағанын да тілге тиек етті. Инвестициялық даулар жөнінде сот ісін жүргізетін жеке алқа, Жоғарғы Сот жанынан Халықаралық кеңес құрылып, судьялық қызметке үміткерлер үшін қойылар талаптың да күшейтілгенін жеткізді. Жоғарғы Сот Төрағасының айтуынша, ҚазҰУ түлектерінің 155 мыңнан астамы республиканың игілігі жолында түрлі салаларда табысты еңбек етуде екен. Елімізде еңбек етіп жүрген әрбір төртінші судья, соның ішінде Жоғарғы Соттың 30 судьясы ҚазҰУ-дің түлегі екендігіне тоқталған Төраға, көп сатылы іріктеуден мүдірмей өту үшін университет қабыр­ғасында берілген білім мен тәрбие жұмыс­тарының сапасы нақты болуы керектігіне баса назар аудартты. «Егемен-ақпарат»