Есілдің арғы жағы, бергі жағы...

Бұл өзі бұрынғы-соңғы өлең-жырларда аты көп кездесетін өзен. Кейбірін айта кетейік. «Есілдің ар жағынан көрдім сені, Сырғаңды қайық қылып өткіз мені».   «Есіл тасып барады жардан асып, Қар жауады жаңбырмен араласып. Шам сөндіріп барайын деген басым, Ұйықтап өліп қалыппын қара басып».   «Қызы едің Ыбырайдың Балқадиша, Есілді өрлей біткен тал Қадиша».   Арқаның егіз еркесіндей екі су – Есіл мен Нұраның құйылысқан тұсында Тәуелсіз еліміздің Астанасы еңсе көтерді. Біз Қазақстанның кіндік қала­сында тұратынымызды мақтан тұтамыз. Тіпті, кейде астаналық «ауруы­мыз» ұстап, айналамызға астам­си қарайтынымызды қайтерсің. Мұнаралы Мәскеуіңізді де көргенбіз. Паңданған Парижіңізге де  барғанбыз. Тұманды Альбионның алтын тұмарындай Лондоныңызға да атізін салғанбыз. Әрине бәрі әдемі. Көшелері көрікті. Ғимараттары ғажап. Тарихи мұра­жайлары таңғажайып. Қарап­тан қарап қайран қаласың. Бірақ, жасы жиырмаға толмаған біздің елордамыздың да өзіндік ерекшеліктері жетерлік емес пе?! Адамның басын айналдырар даму серпінінен болар шаһардың болмысы байқалады. Дүниежүзінің дүлдүл сәулетшілері ұсынған ұтым­ды жобалардың арқасында көз қуан­тып, көңіл сүйсінтер көр­кем­дік көкжиегі күннен-күнге кеңейе берері сөзсіз. Жалпы, жас атау­лы­ның алдыңғылармен салыс­тыр­ғанда бір артықшылығы бар. Ол – бола­шағының әлі алда екендігі. Сондық­тан Алаштың құтты ордасы алдынан ақ күн тууын тілейік, ағайын! Астананы қақ айырып Есіл ағады. Оң жағалауында – ескі қала. Сол жаға­­лауында – жайнаған жаңа аудан­дар. Жасыратыны жоқ, сол­жағалау­лық­тардың бір тамыры артық соғады. Сенбесеңіз, сөз­деріне құлақ салыңыз. «Бәріңіз білетін «Бәйтеректің» түбінен үй алдық». «Пәтеріміздің терезесі Парламент жаққа қараған». Дұрыс-ақ. Алайда, ана оң жаға­лаудағы бес қабатты бетон үй тұр­ғын­дарының да салтанатты сарай­ла­рда тұру туралы қиялдарын қи­сын­сыз дей алмайсыз ғой. Талпын­са, талайының ой-арманы орындалады. Осы орайда қала басшылығы ұстанып отырған саясат көкейге қонады. Ескі нысандарды ебін тауып ысырып, олардың орнына заманауи заңғар құрылыстар салынуда. Қаржылық дағдарыс құрылыс қарқынын тежегеніне қарамастан, жүйелі жұмыстар жүргізілуде. Бұл, әрине, жақсылықтың белгісі. Құстың қуаты – қос қанатында. Оның біреуі ұзын, біреуі қысқа болса, аспанда еркін самғай алмайды. Ендеше, Есілдің арғы-бергі бетіндегі елордамыздың екі қанаты тең болғанына не жетсін, шіркін! Біз алдағы уақыттарда тұла бойы тұтасқан сұлулықтан ғана тұратын, ажары айдай әлемді тамсандыратын Астананы көргіміз келеді. Талғат БАТЫРХАН, «Егемен Қазақстан»