Астанада оқушылар жаз бойы автобустарда тегін жүреді

АСТАНА. 2 маусым. Елордада 7-15 жастағы оқушылар 1 маусым мен 31 тамыз аралығында қалаішілік қоғамдық көліктерде тегін жүретін болды. Бұл туралы astana.gov.kz-ке сілтеме жасаған egemen.kz тілшісі хабарлады. Осы жылдың мамыр айынан бастап қаладағы мектеп оқушыларына атаулы көлік карталары беріле бастады. 7-15 жастағы балаларға аталған карталар оқу орындарында немесе ата-анасының қатысуымен ASTRA PLAT карталары арнайы белгіленген орындарда тегін таратылды. Осы орайда айта кетейік, 2015 жылы фототіркеуден өтпеген және көлік картасын алмаған балалар мамандандырылған ASTRA PLAT кассаларына баруы тиіс. Мамандандырылған кассалар мен карталарды беру пункттері орналасқан орындар туралы 20 маусымнан кейін қосымша хабарланатын болады. Аталған электронды жолақы төлеу жүйесін қолданысқа енгізуге байланысты ұйымдастырылған акция балалардың көлік карталарын пайдалану керектігін үйретеді. Айта кетейік, 1 қыркүйектен бастап оқушылар қоғамдық көліктерде 50 пайыз жеңілдікпен жүретін болады. Ал атаулы көлік карталарын алмаған балалар қалалық қоғамдық көліктермен оқу орнынан берілген анықтаманы көрсетіп, тегін жүре алады. Талғат Райымбек. Дерек, фото: astana.gov.kz.