Енді Илья Ильин де допинг күдігіне ұшырап отыр

АСТАНА. 4 маусым. Польшаның Polska Sztanga порталы қазақстандық ауыр атлет Илья Ильиннің Олимпиялық ойындарда жеңіп алған алтын медальдарынан айрылып қалуы мүмкін деген болжам білдірді. Бұл туралы Sports.kz ақпарына сүйенген egemen.kz тілшісі хабарлады. «Ильин допинг-тексерісте оң нәтиже көрсеткен кезекті Олимпиялық ойындар чемпионы болды. Әдетте ол әлемнің барлық уақыттардағы үздік зілтеміршілерінің бірінен саналушы еді: 2008 және 2012 жылдарғы Ойындарда алтын медаль жеңіп алды, сондай-ақ, әлем чемпионаттарында 4 рет жеңіске жетті. Бұдан бұрын Қытай БАҚ-тары бұл тізімге он спортшының ілінгенін, араларында Ильиннің де бар екенін жариялаған еді», – деп жазады басылым. Еске сала кетейік, мұның алдында Қазақстанның тағы бір Олимпиялық ойындардағы чемпионы – Лондонда алтын медаль жеңіп алған Зүлфия Чиншанлоның допинг-тексерісі оң нәтиже бергені хабарланған болатын. Талғат Райымбек. Дерек, фото: Sports.kz.