«Нұр Отан» партиясы Төрағасының бірінші орынбасары Мұхтар Құл-Мұхаммед өзінің Алматы қаласына жасаған жұмыс сапары аясында қалалық партия филиалының қызметкерлерімен және Қазақ ұлттық аграрлық университеті түлектерімен кездесіп, еліміздегі ең ірі нан өндіру зауытында болды.
Қалалық партия ұйымының қызметкерлерімен болған кездесу барысында Мұхтар Құл-Мұхаммед партия Төрағасы Нұрсұлтан Назарбаев «Нұр Отанның» қызметін барлық басым бағыттар бойынша нығайту жөнінде тапсырма бергенін атап өтті. Күш-жігер Қазақстанның 2050 жылға дейінгі Даму стратегиясын, «100 нақты қадам» Ұлт Жоспары мен «Нұрлы Жол» мемлекеттік бағдарламасын жүзеге асыруға бағытталатынын назарға салды. Осы орайда «Нұр Отан» еліміздің жетекші саяси партиясы ретінде Президентіміздің мемлекеттік саясатын орындап қана қоймай, партия алдына Елбасы қойған барлық міндеттердің орындалу сапасына тұрақты түрде бақылау жүргізуі тиіс екендігі айрықша айтылды.
– Тәуелсіздіктің алтын бесігі болған Алматы қаласы «Нұр Отан» партиясының еліміздегі ең үлкен қалалық филиалы ретінде өзінің әлеуетін «100 нақты қадам» Ұлт Жоспарын жемісті жүзеге асыру мақсатында айқын танытумен қатар, еліміздің өзге өңірлеріне де үлгі болады деп сенеміз. Елбасы мемлекетті қарыштап дамыту мақсатында қабылдаған бес институттық реформа ел мүддесін көздеген 59 заңмен мықтап бекемделді, сондай-ақ, қоғамда түсіндіру жұмыстарының жүргізілмеуі салдарынан туындаған түсініспеушілік мәселесіне ерекше көңіл бөлініп отыр. Мемлекет басшысы және партия Төрағасы сіздерге қала жастарымен белсенді жұмыс атқаруға және оларды қатарға тарту арқылы партия қатарын нығайтуды тапсырды. Бұдан өзге, Мемлекет басшысы ел ішінде түсініспеушілікке тап болған жер мәселесіне мораторий жариялады, осылайша бізге жер реформасына қатысты барлық баптарды халыққа түсіндіруге мүмкіндік берді, – деді М.Құл-Мұхаммед. Партия басшысының бірінші орынбасары «Алматы жастардың қаласы» екеніне арнайы тоқталып өтті. Сол себепті жастармен жұмысты күшейтуге және оларды партиялық жұмысқа тартуға басымдық беруге шақырды.
Бүгінде «Нұр Отан» партиясының Алматы қалалық филиалы 690 бастауыш партия ұйымын біріктіріп отыр. Соңғы жарты жылдың өзінде ғана 11 мыңнан астам қала тұрғыны партия қатарына өтіп, Қазақстанның ең ірі қаласы аталатын Алматыда партиядағылар саны 77 мыңнан асып түсті. Партия мүшелерінің қатары айтарлықтай өсуіне байланысты әрі партия қызметін одан әрі күшейту мақсатында қаланың Бостандық ауданында «Нұр Отан» партиясының жаңа ғимаратын салу жөнінде шешім қабылданған болатын. Партия Төрағасының бірінші орынбасары оның құрылысымен де танысты.
«Нұр Отанның» қалалық филиалы 2016 жылдың басынан бері 370-тен астам шара өткізген. Атқарылған жұмыстардың басым бағыттарының қатарында партияның қоғамдық қабылдау бөлмелері мен Саll-center орталықтары арқылы келіп түскен өзекті мәселелерді анықтау және шешу қала тұрғындарымен өзара әріптестікті нығайту, сонымен қатар, бюджет қаржысының жұмсалу тиімділігіне талдау жасау ісі көптеп кездеседі. Сондай-ақ, партия жер реформасына қатысты құрылған жалпыұлттық пікір алмасуды ұйымдастыруда да үлкен рөл атқарып отыр.
– Алматыда тұрғын үй-коммуналдық инфрақұрылымды жаңғырту үшін 9,2 миллиард теңге бөлінді, әзірге оның 20 пайызы ғана игерілген. Партия ұйымының міндеті – ол қаражаттың мақсатты жұмсалуын қадағалау және үнемі мониторинг жүргізіп отыру. 2015 жылы Үдемелі индустриялық-инновациялық даму бағдарламасы аясында Алматыда іске қосылған 21 жобаның жартысы ғана жобалық тиімді әлеуетке ие болып отыр, – деген партия басшысының бірінші орынбасары Қоғамдық кеңес мамандарының қуатын тиімді пайдаланып, олардың жұмыс қабілетін арттыру керектігін, «Нұрлы Жол» бағдарламасының жүзеге асу барысын партиялық бақылау тұрғысынан мұқият қадағалауды тапсырды.
Жер мәселесі М.Құл-Мұхаммедтің Қазақстандағы ең ірі нан зауытының ұжымымен кездесу барысында басты тақырыпқа айналды. Тәулігіне 150 тоннадан астам нан өнімдерін өндіретін «Ақсай-нан» ЖШС республикада өндіріс көлемі және технологиялық даму деңгейі бойынша көш бастап тұр. Зауыт қызметкерлерінің Жер кодексіне қатысты сауалдарына жауап бере келе, «Нұр Отан» партиясы Төрағасының бірінші орынбасары Қазақстанның әлемдік нарыққа тек бидай өнімдерін шығарып қана қоюы жеткіліксіз екендігін алға тартты.
– Қазақстан әлемдік нарыққа бидай өнімдерін шығарып қана отыруы жеткіліксіз. Біздің еліміз ең үлкен астық өндіруші ел ретінде осы ауыл шаруашылығы өнімдерін, астық өнімдерін одан әрі өңдейтін жаңа технологиялар әкелуі керек. Ол үшін бізге инновация, шеттен инвестиция, осы заманғы ең озық технология керек. Сонда ғана біздің еліміз алдыңғы қатарлы дамыған агроиндустриялы ел болады. Жер реформасының басты мақсаты да осы деп білемін, – деді М.Құл-Мұхаммед.
Партия Төрағасының бірінші орынбасары Қазақ ұлттық аграрлық университетінің профессорлық-оқытушылар құрамымен кездесіп, еліміздің ауыл шаруашылығын жаңғырту мәселелерін талқылады. Мұндағы кездесуге ауыл шаруашылығы саласында жұмыс істейтін ғылыми-зерттеу институттарының 30-дан астам жетекшісі қатысқанын айта кетуге тиіспіз. Ал бүгінде 85 жылдық тарихы мен ұлттық мәртебесі бар аграрлық ғылым мен білімнің қара шаңырағы – Қазақ ұлттық аграрлық университеті оқытушылар құрамы мен студенттері, келген меймандар «Нұр Отан» партиясы Төрағасының бірінші орынбасары М.Құл-Мұхаммед оқыған дәрісті үлкен қызығушылықпен тыңдады.
«Ең қасиетті құндылық» деген тақырыпта көпшілікпен ой бөліскен дәрістік шараны Қазақ ұлттық аграрлық университетінің ректоры, Қазақстан Республикасы Ұлттық ғылым академиясының академигі Тілектес Есполов сөз сөйлеп ашты. Университет басшысы көпшілік алдында сөйлеген сөзінде Қазақстан айналасы 25 жыл ішінде ғана ғасырға татитын тарихи жолдан өтіп үлгергендігін, ел тәуелсіздігінің арқасында өркениетті мемлекеттермен тереземіз теңесіп, экономикамыз индустриялық-инновациялық бағытта өрістеп, халықтың әл-ауқаты жақсарғанын, әлемдік саяси аренада Қазақстан өзінің нақты орны мен беделін айқындағанын айтып өтті. Бұл жетістіктердің барлығы Елбасы Нұрсұлтан Назарбаевтың көреген саясаты мен мемлекет басқарудағы кемеңгерлігінің арқасында мүмкін болған тарихи шындық екендігін жеткізген университет басшысы Қазақстандай жері ұлан-ғайыр, қазынасы тасыған мемлекетке тұтқа болар жастар ел тізгініне тек білім мен өнердің арқасында мығым ие бола алатындығын тілге тиек етті.
– Мен, «Нұр Отан» партиясы Саяси кеңесінің және партияның Алматы қалалық филиалы бюросының мүшесі ретінде, «Нұр Отан» партиясының Алматы қаласындағы ең ірі бастауыш ұйымына тікелей жетекшілік етіп келемін. Бұл тек маған емес, университет ұжымына деген көшбасшы партияның үлкен сенімі деп білемін. Сонымен бірге, университет ұжымы жетекші партияның барлық орталықтарымен, сондай-ақ, студенттеріміз партияның «Жас Отан» жастар қанатымен тығыз байланыста нәтижелі жұмыс атқаруда. Бүгінгі кезде еліміздің өркендеп, дамуына, қоғамдағы саяси тұрақтылық пен келісімнің нығаюына «Нұр Отан» партиясының қосқан үлесі зор, – деді академик Т.Есполов.
Жиынның басты қонағы – Мұхтар Абрарұлы 1991 жылдың 16 желтоқсанында Тәуелсіздік деген асыл құндылығымыздың оңай жолмен келмегендігін тарихи дәйектерді келтіре отырып, тұшымды жеткізді.
– Американы алып ел, ұлы держава ету жолында Вашингтоннан бастап Құрама Штаттардың әрбір заңы мен талабына еңбегі сіңген алып тұлғалар тұр. Қаншама ғасырлардан бері Американың әскери, экономикалық, азаматтық әлеуетін жақсартумен әйгілі заңгерлер, экономистер, қаржыгерлер айналысып, бүгінде әлемге аты әйгілі мемлекетті қалыптастырды, ал бізде оны бір ғана адам ширек ғасыр мұғдарында атқаруда. Ұлттық валютамыз болмап еді – төл теңгемізді шығарып берді, шекарамыз танылмап еді – іргемізді шегендеп, аумақтық тұтастығымызды анықтап берді, экономикадағы кеңестік қатынастар ғана қалыптасқан жерлерді нарықтық қатынасқа өзгертіп берді, ең алғаш «2030» деп елдік дамуымызды көздеген тұңғыш Жолдауын жариялап, Қазақстанды әлемдегі аса дамыған 50 елдің қатарына мерзімінен бұрын қосып берді. Осының бәрі қазақ деген ұлттың келешегі үшін атқарылған телегей-теңіз еңбектің бір парасы ғана, – деді М.Құл-Мұхаммед өзінің дәрісінде.
Аталған жиында қоғамда қызу талқыланып жатқан жер мәселесі де сөз болып, Мұхтар Абрарұлы ешқандай құжатта шетел азаматтарына жердің, анығын айтқанда, ауылшаруашылық жерлерінің сатылуы жайлы бірде-бір сөйлемнің жазылмағандығын алға тартты. Сонымен қатар, «Нұр Отан» партиясы Төрағасының бірінші орынбасары жастарға Тәуелсіздік алу жолында ел ағаларының атқарған үлкен азаматтық еңбегі мен бастарынан өткерген қиын-қыстау шағын, егемендіктің елге белгісіз тұстары мен ел біле бермейтін ерлері туралы, жасалған ерліктер туралы мәнді де мағыналы дәрісімен студент қауымды үйіріп алды. Аумақтық тұтастық үшін болған кеңестер мен жасалған шұғыл шешімдер, төл валюта – теңгеміз туралы, ұлттық құндылықтарымыз – тіл, дін, діл мәселелері мен оның нәзік тұстарына қалай ие болу, ұлттық әскер, экономика-нарық, түрлі ұлт өкілдері бас қосқан бір шаңырақ астында қандай саясат жүргізу керектігін, Мемлекет басшысының халықаралық саяси сахнадағы салмағы мен абырой-биігі жөнінде, елдегі саяси-экономикалық бағдарламалар хақында мағыналы әңгіме қозғалды.
– Жер мәселесі – қай елде, қай қоғамда болса да өте нәзік мәселе. Қазақ қоғамында әрқашанда жердің иесі болған! Жерге деген күтім қазақ халқында ежелден болғандығы хакім Абайдың «Ерте барсам жерімді жеп қоям деп, Ықтырмамен күзеуде отырар бай» деген бір шумақ өлеңінен-ақ көрініп тұр. Сондықтан да, бүгінгі жағдай оқыстан туындаған мәселе емес. Жердің игілігін халыққа көрсету үшін дамыған елдердің әлеуеті мен ғылыми жаңалықтарын пайдалануымыз керек. Қазақтың байлығы оның малы емес, оның жер асты байлығы емес, оның жері ғана емес, қазақтың байлығы – қазақтың өзі! Қазақтың санын қазақ қана көбейтеді. Ең қасиетті құндылығымыз – Тәуелсіздігіміз тұрған кезде біз тек халқымызға ғана қызмет етейік! «Ұлым дейтін елі болмаса, елім дейтін ұл қайдан туады?!» деп Байтұрсынов атамыз айтқандай, бүгінгі жас буын «елім!» деп егіліп тұрса, Елбасы да, ел ағалары да ондай перзентіне «ұлым!» деп еміреніп тұратын болады. Елге қызмет ету үшін білім керек, талмай білім алып, өнер үйреніңіздер, жастар! – деп түйіндеді өз сөзін Мұхтар Абрарұлы.
Қазақ ұлттық аграрлық университетінде өткен дәріс кезінде Мұхтар Құл-Мұхаммед ғалымдар мен студенттердің сауалдарына жауап беріп, ауылшаруашылық саласы ғылымы өкілдері де жан-жақты тұшымды пікірлерін ортаға салды.
Қанат ЕСКЕНДІР,
«Егемен Қазақстан»
АЛМАТЫ
