Өңірде бірінші болып аяқтады

Ақмолалық диқандар жыл сайынғы жақсы дәстүрлерін жалғастырып, дәнді дақылдар егу науқанын биыл да солтүстік өңірде қызу қарқынмен жүргізілді. Қолымыздағы дерек бойынша, өңірдің агроөндірістік кешендері 4 миллион 217,7 мың гектар аумаққа дәнді және бұршақ дақылдарын еккен. Соның ішінде, майлы дақылдар 206,7 мың гектар (100% жос­парлы), көпжылдық шөптесін – 36,6 мың гектар (100%), жүгері сүрлемі  – 8,9 мың гектар (127%), картоп – 18,7 мың гектар (100%) және кө­көніс – 4,4 мың гектар (100%) алқапқа орналастырылды. Ауыл шаруашылығы техникасын дайындау бойынша жұмыстар да уақтылы әрі тиісті деңгейде жүргізіліп, егін себу науқаны басталмас бұрын көліктік-тракторлық парк толық дайындалды. Атап айтсақ, биылғы науқанға 15688 бірлік трактор, 17575 – дәнсепкіш, 1076 – кең алым­ды кешен, 22155 – тырнауыш, 2459 – қопсытқыш және 1086 – сыдыражыртқыш қатыс­тырылған. Сондай-ақ, 2016 жылғы көктемгі егіс жұмыстарын жүргізуге несиелеу бағдар­ламасы бойынша «Есіл ӘАК» ҰК» АҚ кепілдемесі бойынша 5,0 миллиард теңге қаржы бөлінгенін айта кетуге болады. Оған қоса, дән себу жұ­мыс­тарына – 77,1 мың тонна дизель отыны, 8,2 мың тонна жанармай, 4,5 мың тонна жағармай жұмсалған. Бақберген АМАЛБЕК, «Егемен Қазақстан» Ақмола облысы