Тауары тегін дүкен

Қарағанды облысындағы Осакаров ауданының орталығында «Рахмет» деп аталатын дүкен тұтыну­шыларға айқара есік ашты. Бұл сауда орнының басқа дүкен­дерден айырмашылығы сол – мұндағы тауарларды тұтынушылар тегін алады. – Дүкен ашылған алғашқы күннің өзінде 3 отбасын балаларға және ересектерге арналған киім-кешектермен қамтамасыз еттік, – дейді жобаны ұйым­дастырушылардың бірі, «Атамекен» ұлттық кәсіпкерлер палатасы жанындағы денсаулық және қайырымдылық комитетінің Қарағанды облысы бойын­ша жетекшісі Самал Мәтенова. Дүкеннің жұмыс істеу жүйесі соншалықты күрделі емес. Қайырымы мол тұрғындар өздеріне керексіз болып қалған, бірақ қолданысқа әбден жарамды киім-кешек пен тұрмыстық заттарды, үй жиһаздарын осында әкеліп өткізеді. Әзірге Осакаровтағы дүкеннің сөрелері тауардан қайысып тұр деп айту қиын. Сол себепті, жобаны ұйымдастырушылар мұнда Қарағандыдағы дүкеннен де біраз дүниелерді жеткізген. Айта кетейік, «Рахмет» деп аталатын мұндай дүкен алғаш Қарағанды қаласында ашылған болатын. Жоба жұмыс істеген аз ғана уақыт ішінде 170-тен астам отбасы нанды тегін алып, киім-кешек пен басқа да заттарға көк тиын да жұмсамай қол жеткізді. Қайрат ӘБІЛДИНОВ, «Егемен Қазақстан» Қарағанды облысы, Осакаров ауданы