Тараз бен Мәскеу арасында ұшақ бағыттары ашылды

Таразға Мәскеуден «S7» ұшағы алғаш рет келіп қонды. 2013 жылы мемлекеттік бюджеттен 4,6 миллиард теңге бөлініп, «Әулие-ата» халықаралық әуежайы қайта жаңғыртылудан өткен болатын. Нәтижесінде әуежайдың жолаушылар терминалының аумағы едәуір ұлғайып, жаңарып, жоғары мүмкіндіктерге ие болғаны белгілі. Сол кезде әлемнің бірқатар елдеріне ұшақ бағыттарын ашу көзделген еді. «S7» компаниясының өкілі Евгений Чернышев бұл байланыс Қазақстан мен Ресей арасына ғана емес, Еуропаның бірнеше елдеріне ұшақпен жетуге  жол ашатынын айтады. Сондай-ақ, Мәскеу арқылы Ресейдің қай қаласына барып-қайтқыңыз келсе, баратын және қайтатын билетті Таразда тұрып-ақ алуға мүмкіндігіңіз бар екен. Мәскеу – Тараз арасы шамамен 3 мың шақырым болса, 50-55 мың теңге көлемінде қаражат кетеді екен. Осы күні Таразда сағат 7.05-те «Әулие-ата» әуежайынан тұңғыш рет Тараз-Мәскеу бағытын бетке алған ұшақ 136 жолаушымен әуеге көтерілді. Бұл ұшақ Тараз – Мәскеу арасын апта сайын жалғайтын болады. Оралхан Дәуіт. Дерек, фото: egemen.kz