Рамазан айына арналған сыйлық

Қасиетті Рамазан айында жасаған әрбір қайырлы істің сауабы Жаратқанның құзы­ретінде оннан жеті жүз есеге дейін көбейтіледі, дейді. Сауапты істен құр қалғысы кел­меген Ұлыбританиядағы ірі супермаркеттер желісі өз тұтынушыларына жеңілдіктер жасап, мешіттерге көмек көр­сетіп жатыр. Нақтырақ айтқанда, Лондон, Манчестер, Брэдфорд және Бир­мингем қалаларында орналасқан жиырмаға жуық мешітке ерекше сыйлық жасалды. Tesco компаниясы қайырымдылық шараларына арнап жалпы сомасы 30 мың долларды құрайтын азық-түлік қорын құлшылық үйлеріне таратып берген. – Рамазан айы – барша мұсылман қауымы үшін қасиетті ай. Ал біздің тұтынушыларымыз бен достарымыздың көпшілігі Ислам дінін ұстанады. Осыған байланысты бұл айда азық-түлік пен дайын тағамдардың баға­сын 300 супермаркетімізде төмен бағамен сатып отырмыз. Сонымен қатар, тек жеңіл­­діктермен шектелмей, мешіт­терге де көмектесуді ұйғар­дық, – дейді компания менеджері Мэтт Клар. Айта кетейік, биыл ораза айы 29 күнге ұласып, 5 шілде күні Ораза айтымен ұласады. Аян ӘБДУӘЛИ, «Егемен Қазақстан»