• 10 Маусым, 2016

Отаныма оралғаныма еш өкінбеймін

341 рет

көрсетілді

2 мин

оқу үшін

Egemen Qazaqstan

дейді «Жас қанат-2016» жеңімпазы Парасат Отан Семейде қазақстандық жас орындаушылар арасында жыл сайын дәстүрлі түрде өтетін республикалық «Жас Қанат» конкурсында бас бәйгені жеңіп алған әншіге арналған жеке баспасөз мәслихаты өтті. 22 жасар Парасат Отан бұл күндері Әміре Қашаубаев атындағы мемлекеттік филармонияда еңбек етеді. Парасат Қытайда туып-өскен. 2007 жылы ол отбасымен атамекеніне оралғанда қуаныштарында шек болмады. Олар Шығыс Қазақстан облысы, Үржар ауданындағы Благодарное ауылына қоныстанады. Айта кету керек, арғы аталары кезінде Қытайға өткенмен, сол жақта тұрса да, салт-дәстүрлеріне берік болыпты. Олардың отбасының бір ерекшелігі, ер адамдарының әншілік қабілеті. Әкелеріне тартып, бәрі де ән салады екен. Әкесі – Парасатқа қазақ әндерін үйреткен алғашқы тәлімгері. Парасат ауыл мектебінде білім ала жүріп, ән салуын да жалғастыра берді. Осыдан бес жыл бұрын Шәкәрім атындағы мемлекеттік университетке түсіп, кәсіби музыкант болуды мақсат тұтады. Ол музыка кафедрасындағы ұстазы ҚР мәдениет қайраткері, профессор Айтмұхамбет Бейсембековке ерекше риза, «Атамекеніме оралғаныма еш өкінбеймін, осындай ұлағатты жандардың тәлімін көрдім» деді баспасөз мәслихаты барысында ағынан жарылып. Ұстазы ұзақ жылдар бойы Парасаттың дауысын қойып, білімін тереңдеткен. Нәтижесі ойдағыдай, бұл күндері вокалист Парасат халық әндерімен қоса, қазіргі заманауи әндерді, классиканы қатар алып жүреді. «Жас қанат-2016» конкурсына қатысу оңай емес, сынға түскендер барлық талап үдесінен шыға білу керек. Филармонияның көркемдік жетекшісі Қадылбек Омаровтың айтуынша, Парасат әділқазылар алқасының назарына ұсынылатын әндерді өзі іріктеп, таңдаған. «Жорға тай» атты халық әнін эстрадаға лайықтап орындағандықтан, алғашқы әнімен-ақ тыңдаушылардың көңілін баурапты. Әділқазылардың барлығы, тіпті, бүкіл көрермен бірден орындарынан тұра қол шапалақтап, қошемет көрсеткен. Екінші турда ол испан әнін орындаса, финалда италиялық «Изабель» әнін нақышына келтіре шырқаған. Міне, осылайша биік шыңды бағындыра білген жас талант Семейге оралып, филармониядағы еңбек жолын жалғастыруда. Дегенмен, «әттеген-ай» дейтін тұс та жоқ емес, баспасөз мәслихатына қатысушы Зиинура Абдолдинованың айтуынша, жас отбасылы Парасаттың әзірше жеке баспанаға қол жеткізуі қиын болып тұр. Ол келіншегі және жас сәбиімен студенттік жатақхананың аядай бөлмесінде тұрып жатса керек. Раушан НҰҒМАНБЕКОВА СЕМЕЙ