Өндірістегі өрелі істер

Алдағы уақытта Қазақстан теміржолының Семей жол бө­лімшесіндегі теміржолшылары үшін ерекше кезең басталмақ. Мәселен, аймақтағы автокөлік, ұшақ қызметін пайдаланушы ірі өндірістік компаниялардың теміржол қызметіне көшуі жүк тасымалын арттыратын болса, жаңадан бой көтеріп жатқан «Ертіс» көлік-логистикалық орталығы, сауда терминалдары транзиттік әлеуетті еселемек. Одан бөлек, бөлімше басшысы Марлен Көкірекбаевтың бастамасымен теміржолшылардың әлеуметтік ахуалын жақсарту және бөлімше мекемелері аумағын абаттандыру саласында бірқатар жоспарлы істер межеленуде. Ал бұл ретте, «ҚТЖ» ҰК» АҚ Семей жол бөлімшесі филиалы басшылығы өңірдегі атқарушы билікпен тығыз әріптестікте қарқынды іс-әрекетке көшетін болады. Елбасының «Нұрлы Жол – болашаққа бастар жол» атты Жолдауын іске асыру аясында, өңірлер қуаттылығын арттыруда теміржолшылар мен жергілікті билік арасында бірлесіп шешер мәселелер көп. Міне, осы мақ­сатта, алдағы уақытта Семей жол бөлімшесі басшылығы әкім­­дікпен бірлесіп, нақты іс-шаралар жоспарын орындауға көшпек. Бұл жайында өңір басшысы Ермак Сәлімовтің бөлімше мекемелерін аралауы барысында кеңінен талқыланды. Теміржол саласының ел шығысындағы экономикалық әлеуетіне қосар үлесін бағамдау мақсатында және жергілікті сала мамандарының тыныс-тіршілігімен танысу үшін қала басшысы алдымен бірқатар мекемелерді аралады. Семей стансасында болып, пойыздардың маневрлік қозғалысы, вагондарды сұрыптау және қауіпсіздік шараларымен танысты. Қазіргі күні телімдегі контейнерлік жылжымалы құрамдардың жүріс өнімділігі үш есеге дейін артқан. Өндірістегі жетістіктермен та­нысқан Ермак Бидахметұлы сұрыптау дөңесіндегі үдеріс барысына да қанықты. Сондай-ақ, Семей локомотив пайдалану депосында отандық өнім – Эволюшн тепловоздарының қызметі, машинистер еңбегіне де куә болды. Бұл жайында депо директоры Дәулет Ыдырысов таныстырды. Қазіргі күні локомотив шаруашылығында да компьютерлендіру ісі жолға қойылған. Мәселен, машинис­тер бригадасын жұмысқа жі­беру барысындағы автомат­тан­дырылған тексеру, ұшақ «қара жәшігі» тәрізді тепловоз кабинасындағы іс-әрекеттердің дыбыс жазбасын сақтайтын қондырғы қызметі, қауіпсіздік т.с.с. шаралар жаңашыл технологиялар аясында жүзеге асып отыр. Осы ретте, локомотив ша­руашы­лығында қолданылатын, құрылысқа арналған құмның қажеттілігі жайында сөз қозғалды. Локомотившілер оны іргелес облыстан жеткізеді екен. Өңір басшысы жергілікті құмды арнайы сараптамадан өткізіп, қолданысқа енгізуді ұсынды. Бұл тарапта ат­қару­шы билік көмек жасауға әзір. «ҚТЖ» ҰК» АҚ Семей жол бөлімшесі филиалының басшысы Марлен Көкірекбаев сала мамандарымен кездесуге ағымдағы жылғы жетістіктер жайлы ақпарат­тандырып өтті. – Бүгінде жаһандық дағ­дарыс салдарына қарамастан бөлімше бойынша жүк тасымалы оншалықты кеміген жоқ. Мәселен, осы кезеңге дейін Де­гелең стансасында 900 мың тонна көмір тиелініпті. Бұл өткен жылғы көрсеткіштен жоғары. Мау­сымдық жағдайға байланысты жүк тасымалының 62 пайызын қатты отын құрайды. Сондай-ақ, өңірдегі кәсіпорындар өндіретін құ­рылыс материалдары да басымды үлеске ие. Оның ішінде цемент пен орман шаруашылығының өнім­дері мол, – деп атап өтті М.Кө­кірекбаев. Ал қала басшысы бүгінде 6 мыңнан аса еңбеккері бар ҚТЖ-ның Семейдегі филиалы облыстағы ең ірі салық төлеуші мекеме екенін айта келе, аймақтағы әлеуметтік мәселелерді бірлесіп шешуде ортақ келісім қажет екенін айтты. Мәселен, шпал мен өндіріске қажетті құм алуда жергілікті кәсіпкерлерге қолдау жасауға шақырды. Сонымен қатар, Президенттің «Нұрлы Жол» бағдарламасы аясында Семей өңірін дамытуға бөлінген 1 млрд. 800 млн. теңгені игеруде теміржолшылардың да әлеуметтік ахуалын жақсарту көзделіп отырғанын жеткізді. Бұл ретте теміржол вокзалы алаңы абаттандырылмақ. Тағы бір жайт, жергілікті бюджетке 700 млн.-нан аса қаражат теміржолшылардың салығы есебі­нен түседі екен. Ал облыс әкімі Да­ниал Ахметовтің тапсырмасы бойынша, қаланың қаржы қор­жынын өзінде қалдырып, одан тиісінше қаражат бөлу арқылы ша­һарды көркейту ісі жолға қойылып отыр. Ал креативті бас­та­малары мол бөлімше басшысы Марлен Кәрімұлы бұл ретте, темір­жол ауданын көріктендіру жоспарын ұсынуда. Бұл шаралар алдағы уақытта бірлесіп атқарыл­мақ. Раушан НҰҒМАНБЕКОВА Семей