Бастамаларымыздың баянды жалғасы

Осы жылдың 31 мамырында елордада «Дін терроризмге қарсы» деген тақырыпта конференция өткен еді. Онда талқыланған мәселелер өзінің өзектілігімен ерекшеленді. Осыған орай, біз Парламент Сенатының Халықаралық қатынастар, қорғаныс және қауіпсіздік комитетінің төрағасы Икрам АДЫРБЕКОВКЕ жолығып, жиында талқыланған мәселелерге жаңа қырынан келуді өтінген едік. – Бейбітшілік және келісім сарайын­да ұйымдастырыл­ған «Дін терроризм­ге қарсы» тақырыбын­дағы жиын онда тал­қы­ланған өзекті әрі өткір мәселелерімен бүкіл адамзат баласы үшін өте маңызды, – деп бастады сөзін Парламент Сенатының депутаты Икрам Адырбеков. – Форумның негіз­гі мақсаты – Қазақстан Пр­е­зидентінің өткен жылғы қыр­күйек айының соңында Бірік­кен Ұлттар Ұйымы Бас Ас­самблеясының 70-сессиясында БҰҰ аясында терроризмге қарсы күресте әлемдік бірыңғай желі құру және сол желіні құру арқылы барлық террористік ұйымдардың тізімін жасау, және де оған бүкіл халықара­лық қоғамдастықты жұмылдыру жөніндегі ұсыныстарын талқы­лау болатын. Осыған байланыс­ты қатысушылар өз ойларын ашық айтты, ұсыныс-пікірлерін ортаға салды. Елбасының ірі әрі бедел­ді халықаралық ұйым – БҰҰ мін­берінен айтылған сол ұсы­ныстары әлемдік қоғам­дастықта үлкен қолдау тапты, танымал саясаткерлер мен сарапшылар жедел үн қосты. Қазіргі кезде де Президентіміздің сол ұсыныстарына қолдау білдірген пікірлер көптеп айтылып жатыр. Мысалы, жақында ғана Елбасының осы бастамаларын әрі қарай дамыту мақсатында БҰҰ аясында Нью-Йорк қала­сында «Діндер бейбітшілік үшін» деп аталатын үнқатысу алаңы болып өтті. Оған 100-ден астам ұлттық делегациялар қаты­сып, солардың тең жартысына жуығы өздерінің ой-пікірлерін білдірді. «Діндер терроризмге қарсы» халықаралық деңгейдегі сондай іс-шараның жалғасы болып табылады. – Жалпыға ортақ күрделі мәселелер талқыланған бұл форумның ерекшелігі қандай? – Бұл халықаралық кон­ференцияның ең басты ерек­шелігі, жиынға көптеген ел­дер­дің парламентшілері қатыс­қандығында. Нақты айтқанда, түрлі діндер өкілдері мен саясаткерлер бір үстелдің басында бас біріктіріп, қатерлі де үрейлі көрінетін терроризмге қарсы күресу, бүгінде жиі бай­қалып отырған жанжалдар мен қақтығыстардың орын алу себептерін айқындау және оларды шешу жолдарын қарас­тыру. Жиын барысында осы проб­­­ле­маларға қатысты ұсыныстар мен пікірлер көп айтылуда. Бұл конференцияның күн тәрті­біндегі мәселелер өткір әрі өзекті екенін білдіреді. – Конференция барысында терроризмнің Ислам дініне ешқандай қатысы жоқтығына байланысты пікір білдірушілер қатары көп болғанын байқап қалдық... – Ислам – имандылықтың, ынтымақтастықтың, бейбітші­ліктің діні. Сондықтан да, жиында қатысушылар терроризмнің Исламға ешқандай да қатысы жоқ екендігін нақты мысалдар келтіру арқылы дәлелдеп берді. Кейбір саясаткерлер, кей­бір тұлғалар осы Ислам дінін жеке өзінің немесе жекелеген топ­тың мүддесі үшін, дәлірек айт­қанда, өзінің саясаты үшін, материалдық мақсаты үшін пай­даланып отырғаны рас. Осы мәселелерді де қатысушылар ортаға салды, баса назар аудару қажет екенін атап өтті. – Жастардың діни сауат­тылығын жетілдіру мәселелері де әңгіме болды ғой. – Жастарға білім беріп, олар­дың сауаттылығын дамыту жайы да айтылды. Әсіресе, жастардың діни сауаттылығын өрістету, олардың теріс пиғыл­ды ағымдар жолына түсіп кетпеуін бақылау, тағы басқа да мәселелер жөнінде орынды пікір-ұсыныстар ортаға салынды. Жас жеткіншектердің оқып-білім алуына, олардың пайдалы іспен айналысуына жақсы жағдайлар жасалатын болса, жастар ешқашан теріс жолға түспейді. Әңгімелескен Әлисұлтан ҚҰЛАНБАЙ, «Егемен Қазақстан»