Кеше. Бүгін. Ертең

Елордалық жас суретшілердің «KADMII QYZYL» арт-тобы ұсынған «Неономад» көрмесінде үш кезеңнің кескіні ұштасады. Көрменің ашылуында Ұлттық музейдің директоры Дархан Мыңбай жастардың заманауи жұмыстарын жоғары бағалап, оларға шығармашылық табыс­тар тіледі. – Бұл жұмыстардың барлығы да талантты жас суретшілердің ішкі дүниелерін ашып көрсетеді. Мұндай жаңа бастамаларға әрқашан қолдау білдіруіміз керек. Себебі, біз үшін өнердің орны бөлек. Алдағы уақытта да мұндай тың идеялардың авторларын Ұлттық музейден көргіміз келеді. Сондықтан, талапты 7 суретшінің алдағы жұмыстарына табыс тілеймін, – деді Д.Мыңбай. Еске сала кетейік, «KADMII QYZYL» арт-тобы 2010 жылы құрылған. Оның қатарында Бейбіт Әсемқұл, Әйгерім Жұма­ғалиева, Әлия Қаныбекова, Наталья Лигай, Жеңіс Мол­дабеков, Алмас Орақбай, Гүл­марал Тәтібаева есімді жастар бар. Көрмеге олардың 30-ға жуық жұмысы қойылды. Өнер туындыларының арасында  инс­талляция, фотосуреттер, видео-арт және перфоманс бар. Туған үйдің символы саналатын «Ұя» инсталляциясы арқылы көрменің басты идеясы айқындала түседі. Қазіргі таңда бақытты өмір іздеген адамдар құстармен тағдырлас тәрізді. Әлемде үнемі қозғалыс, адамдар қаладан-қалаға, бір елден екінші елге, бір құрлықтан екінші құрлыққа көшіп-қонып жатады. Өмірдің заманауи көшу бейнесі бүкіл әлемге ортақ, бүгінгі көш­пелілер – неономадтар – өзін және өз бақытын табу үшін орын ауыстырудан жалықпайды. Осы арада, өз тамырыңнан қол үзбеу, өзіңнің кім және қайдан екеніңді ұмытпау өте маңызды! Сонымен қатар, көрмеге Наталья Лигайдың «Өмір елесі», Әлия Қаныбекованың «Туған жерім тұғырым», Гүлмарал Тәтібаеваның «Замана көші», Алмас Орақбайдың «Жұрт» фотосуреттерінің топтамасы қойылмақ. Осы жұмыстарда суретшілер қоныс аударудың әлеуметтік-мәдени үрдісіне өз көзқарастары мен ойларын білдіруге тырысады. Мегаполистер өз төңі­регіндегі елді мекендер мен олардың тұрғындарын өзіне сіңіре отырып қарқынды өсу­де. Мұндағы адамдар құм қиыр­шығы сияқты. Алайда, әрбір адам бірегей және талантты, Әйгерім Жұмағалиеваның «Қала алпауыттары» топтамасымен жасалған фототуындылары осы туралы баяндайды. Суретші сәулеттік ансамбльдерді, мүсін композицияларынан гөрі қа­ланы жасайтын және оған жан кіргізетін адамдарды жырлайды. Жеңіс Молдабековтің «Тарих қойнауынан жарқын болашақ­қа» топтамасымен жасалған фототуындыларында бабаларымыздың байырғы көшіп-қону үрдісімен бүгінгі теміржолдар өтіп жатуы ықтимал Қазақстанның кең-байтақ даласына ерекше орын берілген. Суретші өз сю­жеттерінде бүгінгі мен кешегіні ұштастырады. Ал, Бейбіт Әсемқұл­дың «Шек­­сіздік» топтамасымен жа­салған фототуындылары әйелдерге арналған. Қазақ мә­дениетіндегі әйел ежелден отбасы мен дәстүрдің сақтаушысы саналады. Суретші қазіргі за­ман­дағы әйелдің классикалық бей­несінің өзгеруі туралы ой толғайды. Жастар көрмесі 26 маусымға дейін жалғаспақ. «Егемен-ақпарат»