Үш қарғып секірудің үздігі

Үш қарғып секіруден көптен бері Қазақстанның үкілеген үміті болып жүрген Ольга Рыпакова Лондон жерінде алтыннан алқа тағып оралғанда, оның алға қойған бір үлкен мақсатының орын­далғанына бәріміздің көзіміз жетті. Бірақ жеңіл атлет сонымен бар биікті бағындырып болдым деп қарап отырмай, жанкешті жаттығуларын одан әрі жалғастыра берді. Альбион жеріндегі аламанға дейін 2010 жылы Катардың Доха қаласында өткен жабық манеждегі әлем чемпионатында бас жүлде алып, 2011 жылы Оңтүстік Ко­реяның Тэгу кентінде жалау  желбіреткен жаһандық жарыста күміс жүлдеге қол созған, сондай-ақ, 2012 жылы түріктің Ыстанбұл шаһарында дүбірлеткен баспана ішіндегі ғаламдық сайыста екінші тұғыр­дан көрінген тарланымыз содан кейін де осындай айтулы сынақтардан сырт қалған жоқ. Ольга Рыпакова 2014 жылы Кореяның Инчхон қаласында Азия ойындарында топ жарып, 2015 жылы Бейжіңде керуен керген әлем чемпионатында қола медальды қоржынға салды. Ал биыл «Гауһар лига» Гран-Приі жарысында алдымен күміс, сосын алтын медальдарды жеңіп алды. Осының бәрі біздің спортшының нағыз спорттық бабында келе жатқанын көрсетеді. Демек, Рио-де-Жанейродағы Ойындардан оның жүлдемен қайтатынына үміт артуымызға толық болады. – Мен бастапқы кезде жеті сайыспен айналыстым. Уақыт өте келе бұл спорт түрімен айналысу, әсіресе, найза лақтыру, ядро лақтыру маған көптеген қиыншылықтар туғызды. Кейін мен өзімнің таңдауымды ұзын­дыққа секіруге ауыстырдым, бір жылдан кейін үш қарғып секірумен айналыса бастадым. Мүмкін табиғатым оған жақын шығар, мен қарғып секіру техникасын жылдам меңгердім. Бұл жерде ұзындыққа секірумен салыстырғанда, жыл­дамдықты қатты арттыру маңызды емес, мен дұрыс техниканың арқасында, бар жыл­­дамдығымды сақтай аламын, – дейді спортшының өзі. Біз оның осы артық­шы­лықтарын бәсірелі бәсекелерде тиімді пайдалана алатынына сенгіміз келеді.  Дамир ҚОЖАМҚҰЛ