Табысты қорғалған баяндама

Жақында Швейцарияның астанасы – Женева қаласында БҰҰ-ның Адам құқықтары жөніндегі комитетінің 117-ші сессия­сы болып өтті. Онда Қазақстан Республикасының Азаматтық және саяси құқықтар туралы халықаралық Пактінің аясында халықаралық міндеттемелерін орындау бойынша Екінші кезеңдік баяндамасын қорғау жүзеге асты. Қазақстан делегациясының құ­ра­мына Адам құқы жөніндегі ұлттық комиссияның, Жоғарғы Сот­тың, Бас прокуратураның, Орта­лық сайлау комиссиясының, Әді­лет, Ішкі істер, Денсаулық сақ­тау және әлеуметтік даму, Сырт­қы істер, Ақпарат және коммуни­кациялар, Білім және ғылым министр­ліктерінің өкілдері, сондай-ақ, Адам құқы жөніндегі Ұлттық орталықтың өкілдері енді. Қазақстан делегациясының басшысы, Әділет министрінің орынбасары Эльвира Азимова БҰҰ-ның аталған комитеті мүшелеріне елімізде азаматтық және саяси құ­қық­тар мен адам бостандығын қорғау бойынша жүргізіліп келе жат­қан саясат, Қазақстан қоғамы өмі­рін айқындайтын Бес институт­тық реформа мен «100 нақты қадам» Ұлт Жоспарын жүзеге асыру аясында ұлттық заңнамадағы соңғы өзгерістер туралы баяндаманы ұсын­ды. Одан әрі делегация мүшелері БҰҰ комитеті сарапшыларының сұрақтарына жауап беріп, оларды Қазақстандағы әлеуметтік-эко­номикалық және қоғамдық-саяси салалардағы шешуші жаңғыр­тулар мен өзгерістер туралы құ­лағдар етті. Осы қатарда қыл­мыстық сот ісін жүргізу, сот және құқық қорғау жүйесі, адам құ­қы жөніндегі өкілетті өкілдің қызметі, адам құқын қамтамасыз ету саласындағы мемлекеттік өкі­летті органдардың қызметін ұйым­дастыру бағыттарында жүзеге асырылып жатқан жұмыстар да аталды. Комитет мүшелері өздерінің сұрақтары мен комментарийлерінде Қазақстан Республикасында адам­дардың азаматтық және саяси құ­қықтарын қорғау мәселелерінде ілгерілеушілік бар екенін атап өтті. Атап айтқанда, комитет төрағасы Фабиан Сальвиоли Қазақстанның осы салада соңғы төрт жылда қол жеткізген табыстары айтарлықтай екенін ерекше атады. Германия өкілі Анья Зайберт-Фоор Қазақстан тарапы комитеттің ұсынымдамалары мен ескертпелерін орындауға үл­кен жауапкершілікпен келгенін көл­денең тартты. Комитет баянда­ма­шыларының бірі Яхд Бен-Ашур Қазақстанның ел ішінде конфес­сияаралық және дінаралық келісім­ді нығайтуды қоса алғанда, осы бағыттағы халықаралық баста­маларының маңызы да аса зор екеніне назар аударды. Комитет мүшелері алдын ала қорытындылары ретінде жария етілген ұсынымдамаларды жүзеге асыру үшін әрі қарай да шаралар қабылдау қажет болып табылатынын атап көрсетті. «Егемен-ақпарат»