«KazSat-3» жерсерігінің жаңа қызметі

қазақстандық телекөрермендерге бағытталып отыр Цифрлық және жерсеріктік телевизиясының Ұлттық операторы «Қазтелерадио» АҚ ел халқына жаңа сапалы теледидар көрсетілімін ұсынады. Бұл жағдай жаңа қазақстандық «KazSat-3» жерсерігіне көшу нәтижесінде мүмкін болып отыр. Сигнал сапасын анықтау бойынша тестілеу жұмыстары 2016 жылдың ақпан айында аяқталды. «Otau TV» жерсеріктік телехабар тарату желісі абоненттерін отандық «KazSat-3» жерсерігіне көшіру жұмыстарын 2016 жылдың 15 наурызында бастады. Бұған дейін жерсеріктік «Otau TV» телехабар таралымы шетелдік жерсеріктен жүзеге асырылып кел­ген еді. Енді ол жұмысын 2016 жылы аяқтайды. – Қазақстандық жерсерікті таңдай отырып, біз отандық эко­номиканың дамуына сеп боламыз. «Қазақстандық өнімді таңда!» немесе «Қазақстанда жасалған» – жай ғана патриоттық ұран емес. Әрбір қазақстандық өз болашағына, өс­келең ұрпақтың келешегіне осылайша үлес қосады, – дейді «Қазтелерадио» АҚ өкілдері. Қазақстандық «KazSat-3» жер­серігіне көшу көрермендерге қо­сымша SD арналар көруге мүм­кіндік береді. Сондай-ақ, ақылы арналар топтамасына қосылған пайдаланушылар HD арналарды тамашалай алады. – Бүгінгі таңда еліміздің түкпір-түкпірінен 1 миллионнан астам үй шаруашылығы «Otau TV» желісіне қосылған, ал бұл 4 миллионнан астам қазақстандық үшін телеарналар мен радиостансалар­ды тыңдайтын ақпарат көзі – «Оtau TV» жерсеріктік телерадиохабар тарату желісі деген сөз.  Бір жерсеріктен екіншісіне көшу үдерісі пайдаланушыларымыз үшін барынша ауыртпалықсыз өтуі тиіс. Яғни, «KazSat-3» жерсерігінен хабар таратудың техникалық талаптарына сәйкес, абоненттерге қондырғыны қайта теңдестіруге уақыт жет­кілікті болуы керек. Осыған бай­ланыс­ты біздің абоненттерді жерсерікке көшіру кезеңі 2016 жылдың наурызы мен қыркүйек айы аралығында деп белгіленген. Өтпелі кезеңде хабар тарату екі жерсеріктен де жүзеге асырылады. Бұл уақытша шара көшу ке­зінде тұтынушыларымыздың қазақстандық телевизиядан қағы­лып қалмауы үшін қолданылып отыр, – дейді «Қазтелерадио» АҚ Бас коммерциялық директоры Бақ­тияр Өшірбаев. «KazSat» ұлттық жүйесі қа­зақстандық байланыс опе­ра­тор­ларының қажеттіліктерін қа­нағаттандыру үшін жасалған. Сон­­­дай-ақ, ол еліміздің ақпарат­тық қауіпсіздігін нығайтып, мем­лекеттік органдарды тәуелсіз байланыс арналарымен қамтамасыз етеді. – «KazSat-3» жерсерігінде жиі­ліктің Ku-диапазонындағы 28 транспондер орнатылған, олар Қазақстан аумағын байланыс қыз­метімен қамтамасыз етеді. «Оtau TV» қондырғысын күйге кел­тір­ген кезде 58,5 градусқа жаңа гео­стационарлық позиция тіркелуі керек. «KazSat-3» ғарыш аппаратына барынша нақты теңдестіруге арқылы сигналдың ең жоғарғы деңгейіне қол жеткізу керек. Сонда ғана «Оtau TV» желісін сапалы, үзіліссіз қолдануға мүмкіндік болады. Тағы бір айта кетерлік жәйт, қондырғыны теңдестіру кезінде әрбір аймақ үшін антеннаның кө­лемі, МШУ әмбебаптығы секілді факторларды қаперде ұстаған жөн. Тұтынушыларға ыңғайлы болу үшін біз үйрететін материалдар дайындап қойдық. Оларды компания сайттары мен ғаламтор желісінен табуға болады. Сонымен қатар, абоненттер қондырғыны кәсіби түрде қайта теңдестіру үшін дилерлерге хабарласа алады, – деді «Қазтелерадио» АҚ Бас тех­никалық директоры Айдын Бәжекеев. Сұңғат ӘЛІПБАЙ, «Егемен Қазақстан»