Мемлекет басшысы Нұрсұлтан Назарбаев Шығыс өңіріне жасаған жұмыс сапарында облыс орталығындағы жаңадан салынған Қан орталығы мен «Азия Авто Қазақстан» акционерлік қоғамында болды. Алдымен Қан орталығы қызметімен танысқан Президент донация және қан құрамы сапасын автоматтандырылған зертханалық бақылау әдісін енгізуге мүмкіндік беретін орынжайларды аралап көрді. Мемлекет басшысы аталған мекемеде «Донор айлығы» аясында қан тапсырып жатқан әскери қызметшілермен сөйлесіп, жауынгерлерге қан тапсырудың қайырымды іс екенін айтты. Өз кезегінде сарбаздар Отан қорғауға әрқашан сақадай сай екендіктерін мәлімдеді.
Жалпы, облыстық Қан орталығы донор қанымен және оның компоненттерімен қамтамасыз етеді. Мекеменің жобалық қуаты жылына 24 мың литр қан әзірлеуге жетеді. – Бізде озық медициналық құрал-жабдықтар орнатылған. Зертханалық құрылғылардың барлығы 100 пайызға автоматтандырылған. Донордан бастапқы және жұқпалы ауруларға тексеру, биохимиялық талдау алынып, кешенді сапалы трансфузиялық көмек жүргізіледі. 1953 жылы салынған бұрынғы орталықта қан препараттарын дайындау кезінде заманауи стандарттарды қадағалауға мүмкіндік болмаған еді. Өйткені, тозығы жеткен қондырғылар қан қауіпсіздігінің сақталуына жол бермеді, деді облыстық Қан орталығы инфекциялық-диагностикалық зертханасының жетекшісі Гүлдар Матаева. Ал жаңа нысанның аталған олқылықтарды түзетудегі һәм адам өміріне араша түсудегі мүмкіндігі зор.
Президент орталық қызметкерлерімен әңгіме барысында өңірдің медициналық мекемелері қажетті емханалық және диагностикалық жабдықтармен қамтамасыз етіліп жатқанын ерекше атап өтті. Сондай-ақ, адам өмірін арашалауға атсалысатын ұжымның табысты болып, қызмет нәтижелерінің арта беруіне тілектестігін білдірді. Өз кезегінде мекеме қызметкерлері медицина саласына жүйелі қолдау көрсетіліп отырғаны үшін Елбасына ризашылықтарын жеткізді.
Мемлекет басшысы одан кейін «Азия Авто Қазақстан» АҚ базасындағы толық циклды автомобиль кәсіпорыны мен автобөлшектер өндіретін технопарк құрылысын біріктіретін автоөнеркәсіп кластерін құру жөніндегі инвестициялық жобаның жүзеге асырылу барысымен танысты. Президентке технологиялық цикл, өндірістік және инвестициялық көрсеткіштер, сондай-ақ, жобаны жүзеге асыру кестесі баяндалды. Кәсіпорын жетекшілерінің айтуынша, қазіргі кезде зауытта мемлекет тарапынан бөлінген 7 миллиард теңгеге инфрақұрылым жүргізіліп, көліктің жаңа түрлері шығарыла бастады, тиісінше кәсіпорын үлесі күрт артады деп күтілуде. Зауыт конвейерінен шыққан «Лада Ларгус» көліктері ЭКСПО көрмесіне сұранысқа сай көлемде жеткізілуге дайын.
– Машина жасау – индустрияландырудың негізгі тіні. Әрине, бүгінде көп көлік өндіріледі, бәсеке жоғары. Сіздер бәсекеге баға тұрғысынан да, сапа жағынан да төтеп берулеріңіз керек. Көршілеріміз, оның ішінде Ресей көлікті бізден сатып алатындай, қазақстандықтардың барлығы өз көлігімізбен жүретіндей жағдай туғызуымыз керек. Осы мақсатта зауытта бірінші кезекте 60 мың автокөлік, екінші кезекте одан да көп автокөлік шығарылатын болады, деді Елбасы.
Сонымен қатар, автокөлік шығарудың еліміздегі жаңа салалардың бірі екендігін айтқан Мемлекет басшысы еңбек ұжымымен жүздесіп, зауыттың табысты дамуына және бәсекеге қабілеттілігінің жоғары болуына тілектестік білдірді. Телекөпір байланысы арқылы зауыттың конвейерлік құрастыру учаскесінің ұстасы Қанағат Янгушаков өзіне тиесілі конвейерлік желіде Ладаның Калина және Гранта маркалы көліктері құрастырылып жатқанын, әлемдік 4 брендтің 30-дан астам түрі жиналатынын жеткізді.
Ал аға шебер Дәурен Балтабаев зауыттың логистикалық цехында жұмыс істейді. Ол 2014 жылы «Болашақ» бағдарламасы шеңберінде Германиядағы 7 машина жасау кәсіпорнында, оның ішінде «Фольксваген» автоконцернінде тәжірибеден өтуге мүмкіндік алған екен. «Болашақ» бағдарламасының түлегі Елбасына қазақстандық өнімнің неміс көліктерінен кем түспейтін сапаға ие болатынын айтып, уәде берді.
Ал зауытта құрастырушы болып еңбек ететін Алмас Тоқтаубеков колледжде оқып жүрген кезінде «Азия Авто» АҚ-та тәжірибеден өтіп, кейін сынақ мерзімімен жұмысқа кірген екен. Қазір инженер болып істейтін ол бүгінде жоғары оқу орындарынан, оның ішінде «Назарбаев Университеттен» де зауыт алаңында тәжірибеден өтіп жатқан студенттер қатарының артқанын жеткізді. Сондай-ақ, құрастырушы Владимир Сенько зауыттағы 5 жылдық еңбек өтілінде өз қолымен 40 мың көлікті құрастырған екен.
Мемлекет басшысы бұрын шетелдіктердің көлік саласындағы жетістіктеріне таңғалатын болсақ, енді өзімізде де тамаша көліктерді шығара алатын шебер мамандардың қалыптасқанын, зауытқа төртінші мәрте келген осы сапарында жаңа құрылыс алаңдарының салынып жатқанын көргенін, елімізде үздік әрі бәсекеге қабілетті көліктер шығарыла бастағанын, бұл салаға келешекте де мемлекет тарапынан үлкен қолдау жалғасатынын атап өтті.
Заманауи автоөндірісті жолға қою бағытында «Азия Авто Қазақстан» АҚ жүзеге асырып жатқан жоба жылына 120 мың автокөлік шығаруға есептелген. Жоба арқылы Қазақстанның ішкі нарығындағы сұранысты қамтамасыз етіп, өнімді таяу елдерге де экспорттау көзделіп отыр. Осы бағытта алдағы уақытта бірқатар келісімшарттарға қол қойылмақ.
Сапарды түйіндеген Мемлекет басшысы БАҚ өкілдеріне арнап брифинг өткізді.
Қазақстан Президенті Шығыс Қазақстан облысы еліміздің ірі өнеркәсіптік өңірінің бірі екенін және қазіргідей күрделі жағдайда жақсы өсім қарқынын көрсетіп отырғанын атап өтті.
– Мен облысқа ел Тәуелсіздігінің 25 жылдығында келіп отырмын. Өнеркәсіптік өндіріс өсімі биылғы 5 айда 39% болғаны, ауыл шаруашылығы 13%-ға өскені, ал еңбекақы 11%-ға ұлғайғаны қуантады, – деді Мемлекет басшысы.
Нұрсұлтан Назарбаев өңірде индустриялық бағдарламаның, сондай-ақ, «Нұрлы Жол» бағдарламасы аясында автомобиль жолдары құрылысының тиімді жүзеге асырылып жатқанын айтып, облыстың өнеркәсіптік әлеуетіне тоқталды.
– Мұнда «Қазмырыш», «Қазақмыс», Өскемен титан-магний комбинаты, Үлбі металлургия комбинаты, ең ірі су-электр стансасы сияқты еліміздің жетекші кәсіпорындары орналасқаны мәлім, – деді Қазақстан Президенті.
Мемлекет басшысы жұмыс сапарының бірқатар негізгі тұстарына тоқталып өтті.
– Мен біздің машина жасау индустриямыздың алғашқы қарлығашы – «Азия Авто» кәсіпорнына бардым. Қазақстан ешқашан автомобиль шығармаған еді, ал қазір бізде құрастыру өндірісі жолға қойылды. Дамыған автомобиль индустриясы бар көптеген ел нақ осы құрастырудан бастаған. Сосын мамандар даярлап, жергілікті қызметкерлер үлесін ұлғайтып, біртіндеп төл өндірісін іске қосқан, – деді Нұрсұлтан Назарбаев.
Мемлекет басшысы шетелде оқып келіп, бүгінде отандық кәсіпорындарда жұмыс істеп жатқан жас мамандардың үлесін атап өтті.
Қазақстан Президенті «100 мектеп, 100 аурухана» мемлекеттік бағдарламасы аясында іске қосылған облыстық Қан орталығы сияқты әлеуметтік мекемелер қызметінің маңыздылығын айтты.
– Бұл нысан денсаулық сақтау саласы үшін өте маңызды, халық та мұны түсініп, қан өткізу үшін топ-топ болып келіп жатыр, – деді Нұрсұлтан Назарбаев.
Соңында Мемлекет басшысы облыстың жалпы қалыпты дамып келе жатқанын, ал түйткілді мәселелер жүйелі шешімін табатынын айтты.
Думан АНАШ,
«Егемен Қазақстан»
Өскемен
