Мемлекетімізді еңселендірген жеңіс

Қазақстанның БҰҰ Қауіп­сіздік Кеңесіне сайлануы – бұл еліміздің, бірінші кезекте, Ел­басы Нұрсұлтан Назарбаевтың халықаралық аренадағы еңбе­гінің әлемдік қоғамдастық тарапынан мойындалуының жарқын көрінісі. Бұл туралы дауыс бе­ру қорытындылары бо­йынша Қазақстанның Азия-Тынық мұхит мемлекеттер тобынан БҰҰ Қауіпсіздік Кеңесінің тұрақты емес мүшелігіне сайлануына қатысты Парламент Мәжілісінің Төрағасы Нұрлан Нығматулин мәлімдеді. Н.Нығматулин Қазақстан Президентінің ядролық қару­сыз­дану мен өркениетаралық үнқатысу, сондай-ақ, өңірлік және жаһандық қауіпсіздікті қамтамасыз ету ісіне қосқан орасан зор үлесі еліміздің халықаралық аренадағы кезекті жеңісін қамтамасыз еткенін атап көрсетті. Бүгінде бүкіл әлем Қазақстанның әлем таныған Көшбасшы Нұрсұлтан Әбішұлы Назарбаевтың басшылығымен Тәуелсіздіктің 25 жылында қол жеткізген тамаша жеңістіктеріне тәнті болуда. Қазіргі таңда еліміз орнықты нарықтық экономиканы дамытып, әділетті әлеуметтік саясат жүргізіп отыр және демократиялық саяси жүйе қалыптастырған, деп атап өтті Парламент Мәжілісінің Төрағасы. Қазақстанның кандидатурасын дауыс беруге қатысқан БҰҰ-ға мүше 193 мемлекеттің 138-і қолдады. Сөйтіп, Қазақстан жарғысы бойынша жаһандық бейбітшілік пен қауіпсіздікті қолдауға өкілеттілік сеніп тапсырылатын БҰҰ-ның аса маңызды саяси органы құрамына сайланған Орталық Азиядағы тұңғыш мемлекет атанды. БҰҰ Қауіпсіздік Кеңесіне бес тұрақты емес мүшені сайлау БҰҰ Бас Ассамблеясында жүзеге асты. Қазақстан осы ұйымның 2017-2018 жылдардағы тұрақты емес мүшесі болды.