Шаппай бәйге алатын команда

Аспанмен амандасқан ақ бас Алатаудың алақанында отырған атақты Медеу мұз айдыны. Бенди. Мұз айдынында Қазақстан-Моң­ғо­лия құрамалары. Алғаш рет Қысқы Азия ойындарына «сәйгүлігін» үкі­леп қосқан допты хоккейден жа­рысқа үш құрама ғана қатысып жа­тыр. Қырғызстанның бірінші рет қатысуы. Олар алғашқы матчында Моңғолия құрамасынан 17:2 есебімен ұтылған. Содан соң әлемдегі төрттіктің ішіне кіріп жүрген Қа­зақ­­станның қолына түсті. Есеп – 21:0. Осы нәтижелерге қарап Қазақ­стан-Моңғолия кездесуінде қай құраманың жеңіске жететіндігі бесенеден белгілі еді. Солай болды. Матч басталы­сымен жігіттеріміз қарсы қақпаға атой салды. Қырғыздарды жеңіп, сәл де болса көңілдері көтеріліп қалған моңғолдар бастапқыда екі-үш шабуылды тойтарға­нымен, қай­қы таяқшаны қайқы қылыштай сер­мейтін бағландарымыздың тезіне төтеп бере алмады. Моңғол­дар­дың қақпасының тығынын өт­кен­де ғана қырғыздар қақпасына 8 рет ат ойнатып кірген сұрмерген Рауан Есалиев ойынның бесінші минө­тін­де ашып берді. Қанды басың бері тарт деп. Осыдан кейін-ақ моңғолдардан дегбір кетті. Араға екі минөт салып, сұр жебедей суы­рылған Ескендір Нұғ­манов гол соқ­ты. Таудан түйіліп келген тұман айдынды басып қалса да жігіттеріміз қимылдарын бәсеңдетпеді. Ойынды кейінге шегере ме деген қауіпті табиғаттың өзі сейілтті. Тұ­ман етегі түрілді. Оныншы ми­нө­тте Рауан тағы да қақпаны қан­да­ды. 15-минөтте Асқар Темірәлиев суы­рылды. Содан соң Рауан мен Ескендір атқа қайта мінді. Кезек-кезек гол соға­ды. Ойынның 40-шы минөтінде Владимир Новошилов­қа кезек зорға тиді. Бірінші кезең – 9:0. Моңғол хоккейшілері есінен танғандай күй кешіп, үзіліске кетті. Екінші кезеңнің 48-ші минөтінде тағы да Ескендір Нұғманов есеп ашты. Одан кейін әрине жай оғын­дай жарқылдаған Рауан Есалиев. Тек 78-ші минөтте ғана Арыс­тан Қа­зы­баевтың қақпа кілтін тапқаны болмаса, бұл матч Рауан­ның жеке басымдығымен өтті. Рауан бұл жолы 10 гол соқты. Әрине, коман­далық серіктерінің жәрдемімен. – Бұдан да көп гол соғуға мүмкіндігіміз болды, – дейді ол. – Бірақ финалдық ойынға күш сақ­тауымыз керек. Моңғолдар осал деп айта алмаймын. Тегеурін бар. Нашар команда әлем чемпио­наты­на қатыспайды. Олар ақтық сында барын салатын шығар. Бақтияр ТАЙЖАН.