Азаматқа алғысым шексіз

Мен жоғары білімді, жалпы техникалық пән­дер маманымын. 16 жыл педагогикалық өтілім бар. Еңбек еткен жерлерімнен алған мақтау, алғыс қағаздарым да жетерлік. Бірақ, соған қарамастан, 2005 жылы штат қысқарту кезінде жұмыстан босатылдым. Содан бергі алты жыл ішінде ба­сымнан өткен қиындықты дұшпаныма да тілемес едім. Өзім жұмыссыз, асырауымда бала бар. Күн­көріс үшін тірліктің қандайынан болсын қаш­қа­ным жоқ. Сақылдаған сары аязда далада тұрып ше­мішке де саттым. Жұмыс іздеп бармаған жерім, шықпаған тауым қалмады. Тіпті бір баланың заңды қам­қоршысы екенімді де ешкім елеп, ескермеді. Қаладағы қазақша мектептердің кейбірінен орын табылғанымен, баспаналы болу қияметтің зоры екен. «Енді басымыздағы панадан айрылуға болмас» деп туған жерім Тарбағатай ауданы, Ақжар ауылынан ұзап ешқайда кете алмай, мектеп бас­шыларын жағалап жүргенде арада алты жылдың өте шыққанын байқамаппын. Содан бері қанша әкімнің, қанша басшының алдына барма­дым десеңізші, біреуі қайырылмады. Сөйтіп, мен сияқты жалғыз-жарымның мұң-мұқтажын тыңдайтын адамды іздеп шарқ ұрып жүргенімде, Шығыс Қазақстан облысы, Тарба­ға­тай ауданының әкімі болып Манарбек Сапар­ғалиев деген азамат келді. Қайда бармаған басым, ол кісінің де қабылдауында болып, жылап-еңіреп жағдайымды айттым. Ол кісі бірден маған көмек қолын созып, Тарбағатай ауданы, Ақжар ауы­лындағы М.Әуезов атындағы мектепке жұмысқа орналастырды. Бәрінен күдерімді үзген шақта халықтың қамын ойлайтын адам кездескеніне Аллаға шүкіршілік айттым. Ал Әуезов мектебінің басшысы Әділ Егінбаев деген кісі оқушылардың сапалы білім алып, саналы азамат болуы жолында жан аямай, уақытпен санаспай еңбектенетін жан екен. Қайнаған еңбектің ортасына келген мен жұ­мыссыз жүрген жылдарымда талай жайдан кенжелеп қалғанымды сездім. Қазір «есем кетсе де, осындай мықты көшке ілесер күшім кетпесін» деп жұмыс істеп жүрген жайым бар. Мені ос­ын­дай еңбекшіл ұжымның ортасына қосып, жұ­мыс­қа орналастырған, сөнуге айналған үмітім­ді қайта жағып, үлкен адамгершілік танытқан Тарбағатай ауданының әкіміне айтар алғысым шексіз. Айгүл МҰСАИПОВА. Шығыс Қазақстан облысы, Тарбағатай ауданы, Ақжар ауылы.