Хат қоржын

Оқырман ...қолдау көрсетеді Бұл – руханиятымызға деген жанашырлық Кәсіпкерлікке ерекше қол­дау мен қамқорлық жасалып жатқан қазіргі кезеңде біз де мақсатты шаруаны қолға ал­ған жайымыз бар. Еліміздің әлеуметтік-экономикалық әл-ауқатының дамуына, өсіп-өр­кендеуіне өз үлесімізді қо­суды азаматтық парызымыз санаймыз. Күні кеше ғана «ДамуТрансСервис» жауап­кершілігі шектеулі серіктестігін құрдық. Мекемеміз тәй-тәй басып аяқтан тұрып келеді. Басты міндет – халықты ауыл шаруашылығы өнімдерімен қамтамасыз ету. Биыл серік­тестігімізде әзірге оншақ­ты адам жұмыс істейді. Бар­лығы дер­лік ұлттық руханияты­мыз­дың жанашырлары. Еліміз өміріндегі айтулы оқиға – Тәуелсіздігіміздің 25 жыл­дығын атап өтер күн де жақын қалды. Осынау ұлық мерейтойымызға арнап біз де өзіміздің қолымыздан келгенше тартуымызды әзірледік. Қазақстан мұсылмандары діни басқармасы жанындағы «Зекет» корпоративтік қоры арқы­лы Талғар ауданының Нұра ауы­­лында тұратын жағдайы нашар көп балалы отбасыға баспана салу шарасына ма­териалдық көмек көрсеттік. Баспасөзге жазылу науқаны жыл бойы жүргізілетіні белгілі. Осы ретте өзіміз ерекше қа­дір тұтатын ұлттық басылымымыз, мақтанышымыз, рухани азығымыз «Егемен Қазақстан» газетіне қолдау жасағымыз келді. Мекемеміз орналасқан Алматы облысының Қарасай ауданына қарасты Жамбыл ауылдық округінде тұратын 10 зейнеткер мен жағдайы төмен отбасыларды «Егемен Қазақстанға» өз есебімізден жаздыруды ұйғардық. Енді олар 2016 жылдың екінші жарты жылында – алты ай бойы «Еге­мен Қазақстан» газетін тұрақты алып тұратын болды. Ұлттық басылымдар арасында біз үшін өзіміздің байсалды да байыпты «Егеменіміздің» орны қашан да бөлек, қашан да биік.  Мұратжан ШАЙЫҚ,  «ДамуТрансСервис» ЖШС директоры  Алматы облысы ...жаңалығын жеткізеді Жаңа полигон ашылды Бейберекетсіз лақтырылған күл-қоқыстар мен тұрмыстық қалдықтар әрі бұлардың жа­ғым­сыз иістері ауаға тарап, қол­қаны қабатыны рас. Осын­дай жайттарды жою үшін ауыл тұрғындарымен ақылдаса отырып, күл-қоқыс төгетін полигон ашуды жөн көрдік. Сөйтіп, Дариян ауылынан жүретін тас жол бойынан екі шақырым қа­шықтықта орналасқан бұ­рынғы ескі күл-қоқыс орнын бітеп жаптық. Мұның орнына жаңа полигонды Озерный ауылындағы бұрылыстың арғы жағындағы жеті шақырым жерден жасақ­тадық. Еліміздегі кез келген ауыл­дың іші-сырты мұнтаздай таза болғанына не жетсін?! Осы орайда ауыл төңірегінен алыс­тау жерден күл-қоқысқа арналған жаңа орынды ашу ұйғарылып, оның ойдағыдай аяқталғанына тұрғындардың бәрі де түсіністікпен қарап отыр. Енді халық қоқыс тастаудың мәдениетіне дағдыланып, мұның қажеттілігін тереңірек ұғына түседі деп ойлаймыз. Сөздің реті келгенде айта кетейік, заңсыз түрде тұр­мыстық қалдықтар тастаған тұрғындарға айыппұл салынады.  Болат ЕРБОЛАТОВ, Дариян ауылдық округінің әкімі  Батыс Қазақстан облысы, Зеленов ауданы ...үлгі тұтады Кітап оқитын ауыл Соңғы кездері кітап оқу қалып барады дегенді жиі естиміз. Бірақ бұл Мөңке би ауылының тұрғындары туралы емес. Өйткені, ауыл­да­ғы жаңа модельді кітап­хана тұрғындардың рухани серігі болып отыр. Кітап­хана меңгерушісі Балхия Жұма­баеваның айтуынша, 1400-ге жуық кітап қоры бар. Төрт жүз­дің үстіндегі тұрақты оқыр­­­маннан басқа мектеп оқушылары да қажетті көркем шығармаларды іздеп келеді екен. «Рухани әлемнің көш­басшысы – кітап», «Әлем та­ныған Қазақстан», «Ұлылар ұлағаты», «Оқитын өлке» және басқа түрлі акциялар, көрмелер ұйымдастырылады. Ақын-жазушылардың шығар­маларына арналған іс-шара­ларға оқырмандар шын ниет­терімен қатысады. Ал кітапхана меңгерушісі, көп балалы ана Балхия Жұмабаева 2010 жылы ауданның «Жыл адамы» атағын алған. Аудан әкімі жанындағы әйелдер істері және отбасылық-демографиялық сая­сат жөніндегі комиссияның белсенді мүшесі.  Бердібай КЕМАЛ  Ақтөбе облысы ...сүйсінісін білдіреді Алакөлде демалғанға не жетсін! Әр өлкенің жақұттай мөл­діреген өзен, көлдері, табиғат ана сыйлаған қасиетті жерлері көп-ақ. Соның бірі – Шығыс Қазақстан облысы Қабанбай ауылында орналасқан тұзды көлдің бірі – Алакөл. Кезінде ата-бабаларымыз жау қолынан жараланғанда сол көлдің шипасы тиген екен. Өйткені, тұзды су барлық жараны жазатын қасиеті бар, ал балшығы аяқ қақсау, тері ауруларына пайдалы деседі. Көгілдір көл демалуға барған жанның жанын жадырататыны сөзсіз. Қазір елімізде туристік салаға басым бағыт беріп отыр. Ха­лықтың әл-ауқатын жақ­сарту, еліміздің өркендеп өсу жолында бизнестің «Жол картасы-2020», «Нұрлы Жол» бағдарламалары шағын және орта кәсіпкерлікті дамытуға арналған. Осы шипажайдың жол жағдайы аздап қиындық туғызып отырғаны рас. Шал­ғай жатқан ауылға жүретін пойыздың, тікелей ұшақтың жоқтығы қолбайлау болып отыр. Автобуспен қатынайтын жолдардың жағдайы бұрынғыға қарағанда едәуір жақсарған, жөндеу жұмыстары жүргізіліп келеді. Алакөлге 100 шақырым жерде «Барлық Арасан» атты демалыс аймағы бар. Демалуға келген туристерді ол өлкенің табиғаты баурап алары анық. Онда көзді айнадай ашатын бұлақ суы, асқазан ауруын жазатын шипалы су да бар және келушілер жердің астында қайнап шығып жатқан ыстық сумен де емделе алады. Табиғат ана берген осындай мақтан тұтар киелі жерлер Қазақстанның әр өңірінде бар. Шетел асып елдің қаңсығын көргенше, өз еліміздің таңсығына барғанға не жетсін! Айман МҰҚЫШОВА Шығыс Қазақстан облысы