Қармаққа «торғай» балық түсті

Қостанай өңірінде балықшылар торуылдайтын көлдер жеткілікті. Алтынсарин ауданындағы Цыган көлінен де демалыстың осы түрін ұнататындар олжасыз қайтпайды. Кәнігі балықшылардың бірі Алек­сандр Шибанов олжасына өзі таң­ғалды. Оның қармағына түскен мөңке балықтың басы балықтан гөрі торғайға көбірек ұқсайды. – Мен бала кезімнен балық аулаймын. Алпыс жылға жақын уақыт ішінде қармағыма қандай балық түспеді дейсіз. 6 килограмм шортан, 1,5 килограмм тартатын мөңке балық ұстаған кездерім болды. Бірақ қармағыма қандай ірі балық ілінгенде де дәл бұлай таңғалмаған едім, – деп ағынан жарылды балықшы А.Шибанов. Алайда ол балықтың торғайға ұқсаған тұмсығын жаратылыстың «қателігі» деп отырған жоқ. – Мөңке балық бұрын қармаққа ілініп қалып, жұлқынғанда қайта шығып кеткен болуы керек. Содан қармақ қауып, зақымданған ауызы қисық өскенде, торғайдың тұмсығына ұқсап кеткен ғой, – деп түсіндірді балықшы. Осы сапарында балықшының қармағына «торғай» балықтан басқа ештеңе түспепті. Ауа райы қолай­сыз кезде балық қармақ қаппайды. Әншейінде шелектеп балық аулайтын Александр бұл жолы өкінген жоқ, оған «торғай» балықтың қызығы да жетіп-артылды. Қостанайға келген соң ол жақын туыс­тары мен достарына, көрші-көлеміне көрсетіп, жұртты да мәз қылды. Нәзира ЖӘРІМБЕТОВА, «Егемен Қазақстан» ҚОСТАНАЙ