Биыл 1 600-дан аса әскери қызметші пәтер алады

[caption id="attachment_50103" align="aligncenter" width="700"] mod.gov.kz/kaz/press-centr/novosti/?cid=0&rid=2656[/caption] Осы жылдың соңына дейін әскери қызметшілер күрделі құрылыс, күрделі жөндеу және баспана сатып алу арқылы 1 639 пәтермен қамтамасыз етіледі. Биыл Астана қаласының маңындағы Қырқыншы стансада, Ақтау, Семей, Алматы қалалары, Б.Момышұлы, Сарыөзек, Арнасай кенттері мен қала типтес Гвардейск поселкасында тұратын әскери қызметшілер 1 468 пәтер алады. Оларға баспана күрделі құрылыс жасалған соң тапсырылады. Сонымен бірге күрделі жөндеуден кейін Аягөз қаласында 80 және 60 пәтерлі екі тұрғын үй және Үшарал қаласында 19 пәтерлі жатақхана беріледі. Алматы қаласында жалпы ауданы 700 шаршы метрлік 12 пәтерді пайдалануға беру жоспарлануда.  Бұл үйлер әскерилерге сатылады. Жалпы алғанда, бүгінгі таңда Қорғаныс министрлігінің балансында 19,7 мың пәтер бар. Баспанамен қамтамасыз етілгенге дейін әскери қызметшілерге тұрғын үйді жалға алғаны үшін үстемақы төленеді. Осы мақсатта республикалық бюджеттен жыл сайын ақшалай қаражат бөлінеді. Дастан КЕНЖАЛИН