• 06 Шілде, 2016

Қымбатты қазақстандықтар!

417 рет

көрсетілді

2 мин

оқу үшін

Egemen Qazaqstan

Қазақстан халқы Ассамблеясы сіздерді Астана күнімен шын жүректен құттықтайды! Ел тәуелсіздігінің тарихында айқындалған бұл мереке – елордамыздың бас сәулетшісі, Қазақстан Республикасының Президенті, Елбасымыз Нұрсұлтан Әбішұлы Назарбаевтың аса маңызды стратегиялық жобаларының бірі. Астана күні мерекесі қазақстандықтардың жүрегінің төрінен орын алатын ерекше күн. Біз еліміздің тәуелсіздік жылдарында, күнделікті, тынымсыз еңбегімен шыққан ең биік белестері мен қол жеткізген жарқын табыстарын Астана атымен байланыстырамыз. Тәуелсіздік пен Астана – біз үшін екі қасиетті ұғым, халқымыздың мақтанышы мен жетістігі. Нұрсұлтан Әбішұлы Назарбаев айтқандай, «оның жаңа көшелерінде, алаңдарында, саябақтары мен ғажайып сәулет туындыларында біздің тәуелсіздігіміздің ұлы тарихы айнадағыдай бейнеленген». Тәуелсіздік пен Астананың бір-бірінен ажырағысыз да терең байланысы Қазақстан халқы Ассамблеясының 2016 жылғы сәуір айында өткен XXIV сессиясында қабылданған «Мәңгілік Ел» Патриоттық актісінде көрініс тапты. Астана – «Мәңгілік Ел» ұлттық идеясының жарқын символы, болашағы бір елдің астанасы. Тәуелсіздіктің 25 жылдығын тойлағалы отырған Қазақстан халқы үшін Астана халықтың арманындағы қаладан нақты жетістігі мен жеңісі бар өркениетті қалаға айналды. Астанада барша елдің үміті мен армандары жүзеге асады, ол еліміздің даму қарқынының көрсеткіші. Астана қазақстандық жолдың биік стандарттарын айқындайды. Осынау мереке күні Қазақстан халқы Ассамблеясы әрбір отбасына бақ пен береке, бірлік пен татулық, елдің еңселі елордасына өркендеу тілейді! Жас астанамыз жүрегіміздегі жаңарудың, Қазақстан халқының болашаққа деген нық сенімі мен таусылмас жасампаз күшінің символы болсын! Біз сені аялаймыз, Астана! Қазақстан халқы Ассамблеясының Кеңесі