Айқын көзқарас кілті бейбітшілікте

Қазақстанның БҰҰ Қауіпсіздік Кеңесінің тұрақты емес мүшесі болып сайлануына орай, Сыртқы істер министрі Ерлан Ыдырысов Орталық коммуникациялар қызметінің алаңында БАҚ өкілдеріне арнап баспасөз мәслихатын өткізді. Естеріңізге сала кетсек, маусым айының соңғы күндерінде Нью-Йоркте өткен БҰҰ Бас Ассамблеясындағы дауыс берудің нәтижесінде Қазақстан 193 мемлекеттің ішінен 138 елдің дауысына ие болып, жеңіске жеткен болатын. Министр брифингте әлем елдерінің осындай сенімін ар­қа­лау себебіміз бен осы жол­­дағы табандылыққа толы еңбе­гімізді және болашаққа құрылған жоспар-жобаларымыз жайында кеңірек баяндады. Қазақстанның БҰҰ Қауіпсіздік Кеңесінің тұрақты емес мүше­сі болып сайлануын отан­­дық дипломатиямыз бен Мем­ле­кет басшысы Нұрсұлтан Назар­баев­тың үлкен жеңісі екендігін ерек­ше атап өткен министр, мұның Тәуел­сіз Қазақстанның 25 жыл ішін­дегі ең үлкен жетіс­тіктерінің бірі екеніне тоқ­талды. «Ендігі жерде Қазақ­стан өз қызметін БҰҰ аясында жер дүниенің дамуы мен бей­бітшілігінің сақталуына өз үлесін қосатын болады. Қазақ­стан­дық дипломатия үшін бұл үл­кен сынақ және зор мүмкіндік», деді ол. Жалпы, халықаралық тұрақ­ты­лықтың сақталуы мен әлем­де бейбітшілікті ту етіп, ма­мы­ра­жай тіршілік етуге үндейтін Қазақстанның ұстанымы берік әрі шынайы. Сондықтан да терроризмге қарсы күрес пен жер жаһанда жаппай белең алған берекесіздікті тыюда, тыныш­тықты сақтау мен өзге де қауіп-қатерлерге қарсы қимыл-қозға­лыста біздің Елбасы­мыз бір­қатар игі істердің бас­та­ма­шы­сына айналып отыр. Ал мұн­дай мәселелер БҰҰ-ның бас­ты қағи­далары бо­лып табыла­ды. Ен­деше, бұл мүше­лікті Қазақ­стан­ның халықаралық ұйымдар алдында ұсынған бағыт-бағдары мен бейбітшілік сүйгіш халқының әлем жұрт­шы­лығына деген айқын көз­қарасының кілті деуге толық негіз бар. Осы жолда біздің ел БҰҰ-ға мүше мемлекеттермен әріп­тес­тігін жаңа деңгейге көтеріп, бұрын-соңды байланыс бол­­ма­ған елдермен жаңа қарым-қа­ты­нас орнатады деп күтілуде. Атап айтқанда, субэкваторлық Африка мен Латын Америкасы және Кариб бассейні маңындағы мемлекеттермен алыс-беріс пен барыс-келістің іргетасы қалан­бақ. Олай болса, алдағы екі жы­л­да Қазақстанның негізгі жұмыс­тары қандай болмақ? Осы тақы­рып төңірегінде ой қозғаған министр сыртқы саясатымызға қатыс­­ты салада былай деді: «Ең алды­­мен атап айтқымыз келетіні, 2017-18 жылдары халықаралық шең­берде Елбасының БҰҰ Бас Ассамблеясының 70-ші сессиясында мәлімдеген «Әлем. XXI ғасыр» манифесінде айтыл­ған терроризмге қарсы шара­лар мен анти­ядролық және анти­терро­ристік бастамаларды жүзеге асыру, сондай-ақ, ЕҚЫҰ, ШЫҰ, ТМД аясында жалпыадамзаттық құндылықтар мен бастамаларды  ізгі идеялармен қамтамасыз ету көзделуде». Бұдан бөлек, біздің елге Еура­зия кеңістігіндегі қалып­тас­қан дау-жанжалдарды шешу­дің тиім­ді жолдарын табу да жүктеліп отырғаны айтылды. «БҰҰ-ның Орталық Азиядағы про­блемаларды шешуде Қазақ­станға басымдық беруі – өңір­лік қауіпсіздік саласы мен лаң­кестікпен күресте, экстре­мизм мен экономикалық про­блемаларды оңтайландыруда және жаһандық серіктестікті ны­ғай­тып, өндірістік қамтамасыз ету әре­кет­терінде еңбегіміз елді елең еткізерліктей бол­ған­­ды­­ғы­нан», деді Ерлан Әбілфайызұлы. Бақсақ, мұндай әрекеттер Қазақ­стан мен оның Прези­денті­нің Тәуелсіздік алған жылдардан кейінгі кезеңдерде ажырамас темірқазығына айналған екен. Ендеше, ілуде бір бұйыратын осындай халықаралық мінберді пайдалана отырып, Қазақстанды ұлт пен ұлысқа бөлмейтін, тірші­лігі татулыққа негізделген, бей­бітсүйгіш ел ретінде әлемге паш етсек, оның несі айып?!. Қауіпсіздік Кеңесіне жетек­шілік еткенде қолға алатын жұмы­сымыздың келесі бір бағыты – ал­­пауыт елдер арасындағы түр­лі түсінбеушіліктер мен ки­кіл­жің­дер түйінін тарқатуға үн­дей отырып, оларды татулас­ты­ру. Соның ішінде Еуразия құр­­­лы­ғындағы Қазақстанның ұс­тан­ған ұлттық бағыт-бағ­дарын өзгелерге ұқтыру ар­қылы өзіміздің мүдде, мақ­сат­тарымызды қорғау назардан тыс қалмақ емес. Осылайша, Орталық Азиядағы террористік, экстремисттік және эко­номикалық түйіндер мен осы тақылеттес мәселелерді шешу­ге әлемдік қоғамдастықтың наза­рын аудару болмақ. Одан кейін әлем елдерінің мемлекеттері ара­сын­да энергетикалық, ядролық қауіп­сіздікті кеңінен насихаттай отырып, сауда-экономикалық қа­рым-қатынас пен өнімділікті арт­тыру бағытындағы байланысты дамыту көзделеді. Сонымен қа­тар, кәсіби мемлекеттік аппарат құру жүйесін қалыптастыру да Қазақ­­стан тарапынан ұйымға мүше мем­лекеттер назарына ұсынылады. Брифинг соңына қарай, ми­нистр әдеттегідей БАҚ өкіл­дері­­нің сауалдарына жауап берді. Бұл ретте Қазақстанның халық­аралық ұйымға жетекшілік етуінің астарында Мемлекет басшысының туыс Түркия елі мен көрші Ресей арасындағы қарым-қатынастың қайта жандануын жаңаша деңгейге көтеретіндігінен көп елдер үмітті екендігін жеткізді. Нұрлыбек ДОСЫБАЙ, «Егемен Қазақстан»