Шифер емес... черепица!

Еліміздегі ең ірі мегаполистің іргесінде орналасқандықтан болар Іле ауданындағы өндіріс орындарында бүгінде еңбектің қара қазаны қайнап-ақ жатыр. Тапсырыс мол. Тек құрылыс қа­жеттіліктерін өтейтін өнді­рістің бірі ғана былтырғы жылы мемлекетке 512 млн. теңгеден астам салық төлеп, бюджет қоржынын толтыруға қомақты үлес қоса білді. Шетелдік инвестор­лар басшылық ететін осы «STYNERGY» ЖШС үсті болат­пен жұқалап жабылған өнім шы­ғарады. Тұрғын үйлердің төбе­лерін жабуға арналған құрылыс материалдары – черепица сан алуан түспен, әртүрлі көлеммен шығарылып сатылады. «Биыл біз қазақстандық рынок­қа баса назар аударып, жан-жақты сараптама жүр­гізе отырып, заңнама шеңбер­індегі жұмысымызды жүйелі түр­де жалғастырудамыз. Ком­паниямыздың Алматы, Теміртау, Қарағанды қалаларында өндірістік кешендері бар. Жалпы 272 адам тұрақты жұмыспен қам­тылса, 42 азамат келісім-шартпен еңбек етеді. Еңбекақы қоры былтыр 451 млн. теңгеге жетіп, ком­па­ния­ның жылдық айналымы 10-13 млрд. теңгені құрады», деді «STYNERGY» ЖШС директорлар ке­ңе­сінің төрағасы Халдер Тапас. Негізі бұл өндіріс орны 2005 жылы металл өнімдерін сату кәсіпорны ретінде құрылған. Бүгінде еліміздегі ірі өндіріс орнына айналып, қазақстандық рынокта металл өнімдерін шығарып сату бойынша 18-22 % үлеске ие болып отырған жайы бар. Барлық өнімдері ISO 9001-2009 сапа стандартына сәйкес өндіріледі. Алматы қаласы мен облысының шекарасында 1,8 гектар жерді иеленіп әрі теміржол тұйығын да сол жерге енгізіп отыр. Шикізатты Қарағанды металлургия комбинатынан орамдалған болат түрінде әкеліп балқытып черепица шығаруда. Сонымен қатар, үш қабатты сэндвич-панель деп тізбеленетін 12 түрлі өнім тағы бар. Әрқайсысы өзіндік тартымдылығымен назар аудартады. Оның өзі бұл құрылыс ма­териалының қандай да бір қажет­тілікті өтейтіндігін білдіреді. Нұрбол ӘЛДІБАЕВ, «Егемен Қазақстан» Алматы облысы, Іле ауданы