• 12 Шілде, 2016

Ақпараттар ағыны

301 рет

көрсетілді

2 мин

оқу үшін

Egemen Qazaqstan

Үкімет 3200 жұмыскердің жалақысын субсидиялауды бастайды. Оны Денсаулық сақтау және әлеуметтік даму министрлігі қанат қақты режімде жүргізеді. Шара қаржы жағдайы күрделі кәсіпорындардың жұмыскерлеріне қатысты жасалады. Бұл туралы вице-министр Біржан Нұрымбетов мәлімдеді.
Тұрғын үй мәселесін түбегейлі шешу үшін 15 жыл ішінде 1,5 млн. пәтер салынады. Ұлттық экономика министрі Қуандық Бишімбаевтың айтуынша, бұл міндеттерге қол жеткізу мақсатында Елбасы несиеге берілетін тұрғын үйді сатып алу үшін «Бәйтерек» ҰБХ» акционерлік қоғамын бірыңғай оператор етіп белгілеген.
Астанада жеңіл рельсті көлік жолының құрылысы басталады. Келесі айда құрылысы қолға алынатын бұл жұмыс елорданың мега жобасы болып табылады. Ал шойын жолдың құрылысы 2018 жылдың күзінде аяқталады. Ол заманауи жолаушыларды тасымалдау жүйесі Астана халықаралық әуежайы мен жаңа теміржол вокзалын байланыстыратын болады.
Тараздың халықаралық әуежайында Ресей мен Тәжікстанға шығатын тұрақты рейс ашылды. Жамбыл облысының әкімдігінен хабарлағандай, «Ходжанд-Тараз-Ходжанд», «Сургут-Тараз-Сургут» атты алғашқы жолаушылар рейсі болды. «Сонымен бірге, биылғы жылдың 10 шілдесінен бастап «Нижневартовск-Тараз-Нижневартовск» және «Түмен-Тараз-Түмен» бағыттары бойынша тұрақты рейс ашылды», – делінген хабарламада.
Атырауда бекіре тектес балықтың тұқымдық қоры жасақталуда. Бұл балық өсіру зауыттарының іркіліссіз жұмыс істеуі үшін керек. Мұнда бекіре, қортпа, шоқыр мен сүйрік балықтарынан қажетінше тұқым алуға болады.
Жетім балалардың ортақ базасы құрылды. Еліміздің Білім және ғылым министрлігі жетім балалар мен ата-ана қамқорлығынсыз қалғандарға отбасы жылуын сыйламақ. Деректер базасында баланың жынысынан бастап, денсаулық жағдайы, мінезі, туыстарының бар-жоқтығы түгел көрсетіледі. Ақпаратта бала сауалнамасының нөмірі де көрсетіледі. Деректер банкі келер жылдың 1 қаңтарынан бастап жұмыс жасайды.
Заңсыз балық аулағандардан мемлекет пайдасына 60 млн. теңге өндірілді. Табиғат қорғаушылар Іле өзенін әуеден, судан және құрлықтан бақылауды қолға алды. Бірлескен шараның нәтижесінде жыл басынан бері 2 тоннадан астам балық, 20 шақырым Қытай аулары және ондаған моторлы қайық тәркіленген. Бұған қоса, балық аулаудың ең сорақы әдістерін қолданған 6 заң бұзушы ұсталды.