Ультрамарафоншы Дин Карназес

  525 шақырымды жүгіріп өтті Қазақ келген қонағын: «Дәм айдап келіп қалыпсыз», деп қарсы алып жатады ғой. Сондай жандардың бірі – америкалық жүйрік Дин Кар­назес 10 шілде күні Ұлы Жібек жолы бойымен Ташкенттен Бішкек арқылы Алматыға желдей есіп жүгіріп жетті. Оның 525 шақырымдық уль­тра­марофонның соңғы 25 ша­қырымына шын жүйрікті көріп, делебелері қозған Ал­маты тұрғындары да қо­сылып, қошеметтеп кетті. Ультра деген сөздің ма­ғынасы сандық, сапалық белгілері бойынша артық, шектен тыс деген мағынаны білдірсе, Дин Карназес шын жүйрік екенін жалпақ жұртқа мойындатып қойған. Ол 2005 жылы 560 шақырымды 80 сағат 44 минутта ұйықтамай жүгіріп өткен. Дедектеп зыр жүгіруден қандай ләззат ал­ды? Оны қас жүйрік өзінің: «Түні бойы көз ілмей жүгір­ген жүйріктің құпиясы» деген кітабында егжей-тегжейлі жазады. Оның тағдырына жүгіру әу бастан-ақ жазылып қойылған секілді. Балабақшадан үйіне кекілі желкілдеп қас пен көз­дің арасында жетіп келетін. Есейе келе күн-түн тынбай жүгіретін әдет тапқан. 3-сыныпта балалар арасындағы жүгіруді ұйымдастырып, 11 жасында Американың Уитин тауына шыққан. Алға қойған мұраты мен талабы зор желаяққа жақсы ұстаз жолығады. Джек Мак Тэвиш оның бойындағы таң­ғажайып таланттың ашы­­­луына түрткі болды. «Жү­гіруге жүрегіңмен бе­ріл!». Ұс­тазының осы сөзі 54 жас­тағы спортшыға дәл қазір айтылып тұрғандай се­зіледі. 2006 жылы «50 күн. 50 штат. 50 марафон» жобасы Дин Карназестің атын әлемге танытты. Ол туралы көркем фильм түсірілді. Осы ақпараттарды 10 шіл­­де күні Тұран уни­­вер­ситетіндегі кездесуде сөз­деріне әзіл араластыра оты­рып жиналғандарға айтып берді. Тумысынан әзілқой Дин: «Сіздің әйеліңіз де жүгіре ме?» деген сауалға: «Жүгіреді, бі­рақ қатты қо­рыққан кезде», деген жауабына залдағылар ду қол шапалақтаумен жауап қат­ты. Айта кетейік, осы шараны ұйымдастырған АҚШ-тың Алматы қаласындағы консулдығы барлық істің тия­нақты атқарылуына үлкен үлес қосты. Мұндай көпке үлгілі, ұнамды өнер иесі өз ма­ман­дығы бойынша да табыс­ты еңбек етеді. Өзі негізін қалаған таза тамақ өнімдерін сататын компаниясы, мұз­датылған йогурттың түр-тү­рін сататын үлкен дүкені бар екен. Несі бар, бәрі де ізденіс пен еңбегінің, тағдыр берген бағының жемісі дер едік! Жәнібек ҚОЙТАЙ, ҚазҰУ-дың 2-курс студенті АЛМАТЫ