«Алаш» порталы ашықтықты қамтамасыз етеді

Еліміздегі мұнай-газ нарығындағы саудада ашықтық пен мөлдірлікті қамтамасыз ету үшін  «Алаш» атты жаңа портал ашылды. Ол жөнінде Орталық коммуникациялар қызметінде өткен баспасөз мәслихатында Мұнайсервис компаниялар одағының төралқа төрағасы Рашид Жақсылықов айтты. Брифингке бірқатар жаңа­лықтармен келіп отырғандарын айтқан төралқа төрағасы, «Алаш» порталы мұнай-газ саласын­дағы компанияларға жаңа мүмкін­діктердің жолын ашатынын жет­кізді. «Мұнай-газ саласы ел эко­номикасында үлкен рөл атқара­тынын, сондай-ақ, ондағы ақша айналымының аса қомақты екенін де жақсы білесіздер. Сондықтан, бұл саланың керекті деңгейде алға жылжуы үшін ашықтық пен мөл­дірлік аса қажет. Мысалы, «Теңіз­шевройл» компаниясы өзінің бола­шақ даму бағдарламасын жария­лады. Міне, осы бағдарлама бойынша айналымға түсетін қар­жы­ның көлемі 37 млрд. АҚШ дол­ларынан асып жығылмақ. Ал Ақсайдағы КПО компаниясы 10 млрд. АҚШ долларына тең жобаны іске асырмақшы. Осынау мол қаражат жұмсалатын салалар жөнінде ашық ақпараттар болса, ондағы жұмыстардың барынша қарқын алатыны мәлім», деді Р.Жақсылықов. Оның айтуына қарағанда, осы кезеңде мұнай-газ саласында сатып алу үдерістерінің 70 пайыз­дан астамы жабық жағдайда өтеді екен. Бұған қоса ол бүгінгі күнде жер қойнауын пайдалану­шы­ларды үш топқа бөліп қарас­тыруға болатынына назар аудартты. «Бірінші топқа «ҚазМұнайГаз» компаниясының тобына кіретін жер қойнауын пайдаланушылар жатады. Олардың былтырғы сатып алуға жұмсаған қаражатының көлемі 160 млрд. теңгені құраған. Екінші топқа «Теңізшевройл», «Қазақстан Петролеум Оперейтинг», «NCOC», және «Маерск Ойл Қазақстан» компанияларының тұрақты келісімшарттарына қосылған компаниялар кіреді. Бұл топтың өткен жылғы сатып алуларға жұмсаған қаржысы 988 млрд. теңгеге тең болды. Ал үшінші топқа тауарлар, жұмыс және қызмет реестрі арқылы сатып алуға қатысатын жеке компаниялар тобы жатады. Бұл топ былтырғы жылы сатып алуға 208 млрд. теңге жұмсаған. Осы ақпараттардың әрбірі ашық та мөлдір болса деген ниетпен «Алаш» порталы ашылып отыр», деді төралқа төрағасы. Өз кезегінде ақпараттық жобаны әзірлеуші «Алгоритм» ком­па­ниясының сауда жөніндегі дирек­торы Марк Лойе  «Алаш» мұнай-газ нары­ғындағы жаңа мүмкіндіктер пор­талына қазақстандық компаниялар тегін тіркеле алатынын жеткізді. «Алаш» порталына қазақ­стандық компаниялар тегін тір­ке­ліп, біліктілігі туралы анықтама алып, ірі мұнай-газ жобаларына кедергісіз қатысуына болады. «Алаш» деректер қоры базасы тап­сырыс беруші операторлар, мерді­герлермен тауар мен қызмет түрін жеткізушілерді байланыстыратын теңдесі жоқ жоба», деді М.Лойе. Оның айтуынша, портал үш тілде – қазақ, орыс, ағылшын тіл­дерінде болады. Мәліметтер үш тілде бірдей шығып отырады. Қа­зақ­­стандық компаниялар тегін тіркел­се, шетелдік компанияларға ақы­лы түрде қызмет көрсетіледі. Порталға тіркелу оңай әрі жылдам. Бастысы, қажетті құжаттар дұрыс болса болғаны. Нұрбай ЕЛМҰРАТОВ, «Егемен Қазақстан»