«Қазпоштаның» мерейтойлық маркалары

Ұлтымыздың ғұлама ғалымдары мен қоғам және мемлекет қайраткерлерінің мерейтойлық жылдарына орай, «Қазпошта» АҚ «Естелік және мерейтойлық күндер» тақырыбымен сериялы пошталық маркаларды айналымға енгізуде. Солардың қатарында – Әлихан Бөкейхан мен Ыбырай Алтынсарин және Қайым Мұхамедханов сынды ұлт зиялыларының құрметіне арналған пошта маркаларының әрқайсысы 2,5 млн. дана таралыммен шығарылады деп жоспарланған. Ғалымдар мен ойшылдарға арналған пошталық маркаларды айналымға шығару шарасы Әлихан Бөкейханның 150 жылдығы мерейтойының құр­метіне арналған пошта маркасын таныстыру рәсімімен басталды. «Ақ жол» демократиялық пар­тиясының Орталық кеңсесінде өткен жиынға елімізге белгілі алаштанушылар мен осы жолда жанын пида еткен қайраткерлер өмі­рін зерттеп жүрген азаматтар және қоғам белсенділері қа­тыс­ты. Отырысқа жетекшілік еткен «Ақ жол» демократиялық партиясының төрағасы, Мәжіліс депутаты Азат Перуашев пар­тияның Парламенттік фракция­сының атынан өткен жылдың желтоқсан айында «Қазпошта» АҚ-тың басшылығына арнайы жолданған сауалда халықаралық деңгейде мойындалған, саңлақ саясаткер, мемлекет және қоғам қайраткері, ғұлама ғалым, көсем­сөздің шебері Әлихан Бөкей­ханның 150 жылдық мерейтойы құрметіне арнайы пошта мар­касын шығару қажеттігі айтыл­ғандығын еске түсірді. «Осындай хаттың негізінде ай­тыл­ған ой-пікіріміз, мінеки, бүгін орындалып, «Қазпошта» АҚ же­текшілерінің шешімімен номи­­налы 5 теңгелік пошталық мар­­калар айналымға енгізілуде. Бұл тәуелсіз еліміздің баянды бо­ла­шағы үшін басын бәйгеге тіккен арыс азаматтары­мыз­ды ұлықтау мен оларды наси­хат­таудың ұтымды әдістерінің бірі», – деді Азат Тұрлыбекұлы. «Ұлттық Банк Банкнот фаб­рикасы» республикалық мем­лекеттік кәсіпорнында басылып шыққан маркаға қоғам қай­раткерінің нақ 110 жыл бұрын Петербургте түскен суреті са­лын­ған. «Бұл Ә.Бөкейханның 1906 жылы 8 шілде күні Пе­тер­бургке барған кезінде Бірінші Мем­лекеттік Думаның депутаты ретінде түскен суреті. Алай­да, ол жерде сурет астына оның аты-жөні «Ханов» деп қате жазыл­ған. Қазіргі кезге дейін бұл фото бізге Булла фото­ателье­сінің өнімі ретінде белгілі. Ал Әлиханның әлемге әйгі­лен­ген ең танымал бейнесі осы бол­ған­дықтан, біз ақылдаса келе осы суретті пошталық маркада қай­та жаңғыртуды жөн көр­дік», – деді «Алаш» ғылыми-зерт­теу институтының директоры Сұл­тан Хан Аққұлы. Айта кетейік, салтанатты ша­ра аясында офсеттік басылым­да 2 түсті бояумен салынған Әли­хан Бөкейханның суреті бейнеленген көлемі 26х18 мм. марка жапсырылған конверттерге арнайы пошта мөрқалыбы да басылды. Сондай-ақ, «Ақ жол» партиясы өкілдерінің ұсынысымен жүзеге асқан жобаның тұсаукесер рәсіміне қатысқан алаштанушы ғалым Ербол Тілешов пен Сағымбай Жұмағұлов, сондай-ақ, Кенжеболат Жолдыбай, Қайырбек Сәдуақасов, Әлихан Бө­кейханның туысы Асылхан Тілеуқабыл, «Қазпошта» АҚ басқармасы төрағасының орынбасары Сәуле Егембердиева, «Ақ жол» ҚДП Орталық кеңесінің идеологиялық жұмыс жөніндегі хатшысы Сәбит Байдалы сынды азаматтар сөз сөйлеп, Әлихан Бө­кейханның 150 жылдығы мен келесі жылғы Алаш автоно­мия­сының құрылғанына 100 жыл толатынына орай ұсыныс-пікірлерді ортаға салып талқы­лады. Нұрлыбек ДОСЫБАЙ, «Егемен Қазақстан»