Асық атқан қариялар

Көкшетау қалалық ардагерлер кеңесі ұлттық спорт түрлері мен саламатты өмір салтын насихаттау мақсатында «Асық ату» және «Бес тас» І жалпықалалық жарысын өткізді. Бұл бәсекенің ерекшелігі мен артықшылығы – оған отыздан астам ақсақалдың қатысуында дер едік. Жарысты ұйымдастырған «Қазақ тілі және мәдениеті» облыс­тық ұйымының, «Мирас» кеңесінің және «Нұр Отан» партиясы облыстық филиалының өкілдері аталар үлгісі ұлттық ойынды осылайша жаңғыртуды жөн санапты. – Біз құрметті еңбек демалысында жүрсе де аталарымыз бен әжелеріміздің саламатты өмір салтын насихаттаудағы, жастардың бойына ұлттық дәстүрлеріміздің тәлімдік маржандарын ұялатудағы белсенді қызметіне ризашылық білдіреміз. Қазыналы қарттарымыз өз үлгісімен өскелең ұрпақты асыл ойлар мен биік мақсаттарға жетелей беретіндігі қуанышты. Бойларыңыздан қуат кетпей, ақылшымыз болып жүре бері­ңіздер, – деді жарыстың ашылу салтанатында Көкшетау қаласы әкімінің орынбасары Алтынай Әміренова. Ереже талаптарына сәйкес  «Асық атуға» қатысушылар жар­қыраған сүйектерді шеңберден мүмкіндігінше көбірек шығаруы қажет. Жүздері шат қариялардың қолындағы асықтар ұршықша иіріліп, ауыр соққымен дөп тиіп жатқанына көрермен дүркіретіп шапалақ ұрумен болды. – Әрине, бала кезімізде барлы­ғымыз асық ойнадық. Бұл ең қызықты дәурен еді. Оқудан қолы­мыз босасымен әшекейлі дорба­мыздағы қорғасын құйылған сақа­лармен жердің шаңын шыға­ратынбыз. Одан бері де қаншама уақыт өтті, бүгінгі жарыс көрігін қыздырған шалдар балалық шаққа оралғандай күй кешуі қандай ғанибет, – дейді бізбен тілдескен ҰҚК бастауыш ардагерлер кеңе­сінің төрағасы, отставкадағы полковник Сайлаубай Ыбыраев. Осыдан болса керек, жарысқа қатысушылардың барлығы шебер ойын көрсетіп, жеңіске деген жігер танытты. Әрине, балалық шақтың «рекордтарын» қайталамаса да  мергендігімен көзге түскендерге қызыға қараушылар көп болды. Тартысты жарыста қалалық ардагерлер кеңесінің төрағасы Шиап Әлиев бірінші, ал Хабиболла Ғазизов пен Жұмағали Жұрымбаев жүлделі орындарды еншіледі. Әжелер арасындағы «Бес тас» бәсекесінің қызығы бір төбе еді. Мұнда Жібек Балабекова алдына жан салмады. Қазылар алқасының шешімімен Күлмаш Самаева екінші, Кенжебай Смағұл үшінші орынды еншіледі. Жарысқа қатысушылардың барлығы көрермендерге қуа­ныш сыйлаумен қатар, сый-сыя­паттарға ие болды. Жарысты ұйым­­дастырушылар бұл бәсе­кенің дәстүрлі сипат алатынын атап өтті. Бақберген АМАЛБЕК, «Егемен Қазақстан» Көкшетау