Сенімділік – үлкен істер бастауы
Мемлекет басшысының атына еліміз азаматтарынан биылғы Қазақстан халқына Жолдауына қолдау білдірген хаттар толассыз келіп түсуде, деп хабарлады Қазақстан Республикасы Президентінің баспасөз қызметі. Оңтүстік Қазақстан облысы, Шардара ауданының бір топ ардагерлері атынан жолдаған хатында Т.Ағманұлы «Елбасымыздың биылғы «Болашақтың іргесін бірге қалаймыз» атты Жолдауын оңтүстіктің шалғай ауданында тұратын бір топ ардагер ерекше ықыласпен тыңдадық», деп жазады. Одан әрі хат иесі бұған дейін алға қойылған міндеттердің толығымен орындалғанын айта келіп, Президент Жолдауында айқындалған келелі міндеттердің де белгіленген мерзімінде іске асатынына сенімін білдіреді. Тараз қаласының тұрғыны, «Алтын алқа» иегері А.Дүйсенбекова көп балалы аналар атынан өзінің пікірін былайша жеткізеді: «Елбасымызға бүкіл Қазақ халқы, қазақ елі және ұлық аталардан бастап бесіктегі балаға дейін риза! Елімізде жәрдемақы, жалақы және зейнетақының көтерілуі кімді болсын қуантады. Қалаларда, аудандарда сәбилерге арналған балабақшалар бой көтеріп, ата-аналар қуанышқа бөленуде. Халқымыздың армандаған ойлары толығымен орындалып келеді». Сонымен қатар, ардақты ана Елбасына, елге, Отанға байланысты ой-толғамдарын өлең жолдарына арқау еткен.Біз сізбен бірге күштіміз
Мемлекет басшысы Нұрсұлтан Назарбаевтың атына қазақстандық азаматтардан 7-ші Қысқы Азия ойындарының табысты өтуіне байланысты құттықтаулар көптеп келіп түсуде, деп хабарлады Қазақстан Республикасы Президентінің баспасөз қызметі. Атап айтқанда, Ақтөбе облысының спортшылары Қазақстанда спорттық іс-шараның жоғары деңгейде өткізілгені үшін шынайы ризашылықтарын білдіреді. «Сіз Азия ойындарын ашық деп жариялағанда стадионды көрермендердің қол шапалақтауы дүр сілкіндірді. Біз Сізге жүрекжарды ықыласымызды білдірдік. Сіздей Президентіміз бар болғаны үшін біздің жүрегіміз мақтанышқа толды. Сізбен бірге біз – күштіміз!», делінген хатта. Сондай-ақ, Алматы қаласындағы №50 мектептің ұжымы мен оқушылары Мемлекет басшысын Азиаданың табысты өтуімен құттықтайды. «Біз Азиадаға үздік спортшыларды жиған өз елімізді мақтан тұтамыз. Бізге, алматылықтарға, өз қаламызда әр спорт түрлері бойынша шеберлерді кездестіру бақыты бұйырыпты. Азиаданың табысты өтуі Қазақстанның сенімді қолда екенін тағы да көрсетті. Біз тұрақтылық, бейбітшілік пен құт-береке орныққан елде өмір сүріп жатқанымызға бақыттымыз», деп атап өтілген хатта. Қарағанды мемлекеттік техникалық университетінің ректоры А.Ғазалиев оқытушылар мен студенттердің жүрекжарды құттықтауларын жеткізеді. «Біздің елімізде Азияданың өтуі – бұл азаматтардың әл-ауқат деңгейі жоғары, бейбітшілік пен келісім салтанат құрған мемлекет ретінде Қазақстанның халықаралық беделінің көрсеткіші. Осының бәрі елімізді экономикалық, әлеуметтік және саяси жаңғыртуға бағытталған, Сіз жүргізіп отырған дана және көреген саясаттың нәтижесі», деп атап өткен хат иелері. «Нұрсұлтан Әбішұлы, Азиадаға даярлық жасау және оны өткізу – Сіздің басшылығыңызбен атқарылған қыруар іс. Адам игілік, бейбітшілік және жасампаздыққа ұмтылуы тиіс. Азия ойындарының ашылуы мен жабылу рәсімдеріндегі орындалған керемет көріністер терең шығармашылық ойға, мазмұнға құрылғанын көрсетті», делінген Алматы қаласындағы №70 мектептің ұжымы жолдаған хатта. «Қарағанды облысындағы жазушылар одағы» қоғамдық бірлестігінің төрағасы, Жезқазған қаласының құрметті азаматы Валерий Могильницкий өз хатында Мемлекет басшысы Н.Ә.Назарбаевтың саясатының арқасында Қазақстан өзінің бейбітшілік, жасампаздық, еркіндік және адамдарға деген құрмет тәрізді ұстанымдарды берік ұстанатынын әлемдік қоғамдастыққа көрсеткенін атап өткен. «Біздер, қарағандылықтар, Қарағанды облысы бойынша Олимпиадалық эстафетаның басталуын Қарағандыдағы Тәуелсіздік стеласы алаңынан өз көзімізбен көрдік. Бұл –ұмытылмас оқиға. 7-ші Қысқы Азия ойындары Қазақстанда спортты дамытуға жаңаша серпін берді. Мен өз елім үшін, өз Президентім үшін, өз спорттық жетістіктеріміз үшін мақтанамын», делінген Қарағанды облысы кәсіподақтар федерациясының төрайымы А.Мадиярованың хатында. 7-ші Қысқы Азия ойындарының табысты өтуіне байланысты өз құттықтауларын білдіргендердің қатарында Алматы қаласы, Түрксіб ауданының медициналық қызметкерлері, Алматы қаласы- ның тұрғындары З.Сәрсемханова, В.Жақсылықова, Орал қаласының тұрғыны А.Касмаль да бар.
