«Мектепке жол» шарасы басталды

 

Жыл сайынғы «Мектепке жол» республикалық акциясы биыл «Бақытты балалық шақ аумағы» ұранымен тамыздың 1-інен қыр­күйе­к­тің 30-ына дейінгі аралықта өт­кізіледі. Шарапатты шара тұрмысы төмен, көпбалалы отбасылардан шық­қан, жетім және ата-анасының қамқор­лы­ғынсыз қалған балаларға материал­дық және т.б. көмек көрсетуді көздейді. «Сегіз жылдың ішінде акция аясында елордада 42 700 оқушыға барлығы 362 млн. 564 мың теңге көлемінде ма­териалдық көмек көрсетілді. 2016 жылы жергілікті бюджеттен аз қам­сыз­дандырылған отбасылардан шыққан балаларға жаппай оқыту қорына 159 млн. 557 мың теңге бөлінді. №16, 56, 59 мектептерде халыққа консультативтік көмек көрсету үшін қоғамдық қабылдау бөлімдері ашылады. 10, 17 және 24 тамызда сағат 11-ден 17-ге дейін аталған бөлімдерге әлеу­меттік көмек көрсету, мек­тепке ор­на­ластыру мәселелері бойынша жүгінуге болады. Сонымен қатар, Кәсіпкерлік және өнеркәсіп ба­с­қар­ма­сы 20-21 тамызда орталық алаңда мектеп жәрмеңкесін ұйым­дас­тырады. Жәрмеңкеде мектеп формасы, кеңсе жабдықтары мен оқу­лық­тар базардағы­дан төмен баға­мен сатылады. Және де, «Ал­ғаш рет бірінші сыныпқа», «Отбасы отбасыға көмектеседі: баланы мектепке жинаймыз», «Балаларға бірге көмек­тесеміз» қайы­рым­дылық шаралары өт­кізіледі. 10 тамызға дейін «Мейірімді қол» акциясы бойынша барлық ірі сауда орталықтарын­да дәлірек айтсақ, «Хан Шатыр» сауда ойын-сауық орталығы, «Ор­­та­лық базар», «Евразия» СО және т.б. сауда орталықтарында тұр­мысы төмен отбасылардан шық­қан балаларға көмектесу үшін мек­тепке қажетті киім-кешектер мен заттар жинауға арналған контейнерлер орнатылады», – деді Білім және ғылым министрлігінің Балалар құқығын қорғау комитеті төрағасының міндетін атқарушы Мәншүк Әбдікәрім. Бүгінде Білім және ғылым ми­­­­нистр­­лігі еліміздің барлық аза­мат­­­тарын – кәсіпкерлерді, ме­­­це­­н­ат­­­тар­ды, қарапайым адамдар­ды «Мек­тепке жол» акциясына қо­сы­­луға шақырып отыр. Акцияға қо­­­сы­лу­ға ниет білдірушілер­ден Бала­­­­­л­ар құ­қықтарын қорғау коми­­теті­­­нің телефонына – 8 (7172) 74-21-40, сондай-ақ облыстардың, Ас­та­на мен Алматы қала­ларының білім бас­­қар­маларына хабарласуды сұрай­ды. Рауан ҚАЙДАР, «Егемен Қазақстан»