Кәсіпкер боламын дегенге курс ашылды

[caption id="attachment_54275" align="aligncenter" width="700"] Оңтүстік Қазақстан облысының әкімдігі[/caption] Мемлекет басшысы халыққа Жолдауында шағын және орта бизнесті дамыту мақсатында кәсіпкерлікті қолдаудың «Бизнестің жол картасы – 2020» бағдарламасы өңірдегі инвестициялық бағдарламаларының бір бөлігі болуы тиістігін атап көрсеткен. Осы жұмыстар аудан, қалаларда жақсы қарқын алды. Тоғыз жолдың торабында орналасқан Арыс қаласындағы кәсіпкерлер мектебінде арнайы курстар ашылған. Онда өз кәсібін енді ашуды жоспарлап жүрген бастамашыл тұрғындар мен оны әрі қарай дамыту ниетіндегі кәсіпкерлерге кәсіпкерліктің негіздері бойынша оқытылады. Қысқа мерзімдік оқыту жобасына қатысушыларға бизнесті ашу, маркетингтік және басқарушылық қабілетті дамыту, қаржы заңдылығы секілді бизнесті сауатты жүргізуге қатысты мәселелерде тәжірибесі мол, білікті Арыс қалалық кәсіпкерлік мектебінің бизнес тренері Ж.Кенжебеков дәріс береді. Жақында осы оқу курстарын бітірген жиырма азамат арнайы сертификатқа ие болды. Енді оларға бизнестің жаңа түрін ашуға ешқандай кедергі болмайды. Өйткені, білім-біліктері жетеді. Бақтияр ТАЙЖАН Оңтүстік Қазақстан облысы