Париж келісіміне қол қойды

Нью-Йорк қаласында БҰҰ-ның штаб-пәтерінде Сыртқы істер министрі Ерлан Ыдырысов Қазақстан атынан Климаттың өзгеруі туралы Париж келісіміне қол қойды, деп хабарлады Сыртқы істер министрлігінің баспасөз қызметі. Климаттың жаһандық өзгеру проблемасының шешімі тұрақты дамуды қамтамасыз ету, кедейлікті жою және әлемнің барлық елдерінің әлеуметтік-экономикалық әл-ауқатқа қол жеткізуі үшін негізгі шарттардың бірі болып табылады. Париж келісімі әлемдік қоғамдастықтың қоршаған ортаның құлдырауын тоқтату шешімінің маңызды символы болды. Қазақстан ұлттық және өңірлік деңгейлерде экологиялық проблемаларды шешуге елеулі үлес қосып жатқан ел ретінде осы тарихи келісімді іске асыруға ерекше мән береді. Сонымен бірге, «Болашақ энергиясы» тақырыбымен «ЭКСПО-2017» көрмесін өткізу тұрғысынан Париж келісімінің маңыздылығын атап өткен жөн. Көрме барысында қоршаған ортаны сақтау мәселелеріне бірінші кезекте назар аударылады. Сол күні Е.Ыдырысов БҰҰ-ның Бас хатшысы Пан Ги Мун­мен екіжақты кездесуді өткізді. Кездесу барысында тарап­тар Қазақстанның БҰҰ-мен ынтымақтастығының жай-күйі мен перспективаларын, сондай-ақ 2017-2018 жылдары біздің еліміздің БҰҰ Қауіпсіздік Кеңесіне мүшелігінің басымдықтарын талқылады. Е. Ыдырысов БҰҰ Қауіпсіздік Кеңесінің «Балалар және қарулы қақтығыстар» тақырыбындағы ашық пікірталастарында сөз сөй­леді. Өз сөзалымында ми­нистр ағымдағы халықаралық мәселелер бойынша еліміздің ұс­танымын ұсынды, атап айтқанда, Ауғанстандағы мектептер мен ауруханаларды салу, білім беру бағдарламаларын іске асыруды қоса алғанда гуманитарлық көмек бағдарламаларын жүзеге асырып жатқан Қазақстанның қосқан үлесі жайында айтты. «Егемен-ақпарат»