Грант кімге бұйырады?

Л.Н.Гумилев атындағы Еуразия Ұлттық университетінде білім гранттарын бөлу жөніндегі республикалық конкурстық комиссияның отырысы өтті. Білім және ғылым министрі Ерлан Сағадиевтің төрағалығымен өткен комиссия отырысында еліміздің ЖОО-на қабылдау жөніндегі жұмыс қорытындыланды. Министр комиссияның өз жұмысында еліміздің әлеуметтік-экономикалық даму басымдықтарына – ең алдымен, Елбасының бастамасымен жүргізіліп жатқан Қазақстанның индустриялық-инновациялық дамуы, сондай-ақ, еліміздің агроөнеркәсіп кешенінің даму мақсаттарын іске асыру қажеттіліктеріне назар аударғандығын атап өтті. Аталған басымдықтар ес­керіле отырып, 12 593 грант техникалық және тех­но­логиялық мамандықтарға, 5 000-ға жуық грант – педа­гогикалық, 2 690 грант – ауыл шаруашылығы және ветеринария мамандықтарына, 3000 грант – ме­ди­циналық мамандықтарға бөлінгенін тілге тиек етті. «Биыл жалпы 31 702 грант бөлініп отыр, оның ішінде, 2 950 грант – ЖОО дайындық бөлімдерінде оқуға, 28 752 грант – ЖОО-ның 1-курстарында оқуға (күндізгі оқу бөлімдеріне – 28 452, сырттай оқу бөлімдеріне – 300 грант). Оқу гранттары 87 ЖОО-ға бөлінді. Өткен жылы 64 оқу орны қамтылған еді. Оқу гранттарын алу конкурсына 59 677 адам қатысты. Олардың 47 342 – қазақ тілінде, 12 335-і орыс тілінде оқиды. «Мәңгілік Ел жастары – индустрия­ға!» жобасы аясындағы квота бойынша өткізілетін конкурс­­та 9 797 адам бақ сынайды. Олардың ішінде 2 208 «Алтын белгі» ие­герлері, 303 колледж түлектері, 169 халықаралық және республикалық олимпиадаларының жеңімпаздары, 854 халықаралық және республикалық ғылыми жарыстардың жеңімпаздары, 948 халықаралық және республикалық спорттық жарыстардың жеңімпаздары, 9 Президенттік олимпиаданың жеңімпаздары бар. Сонымен қатар, конкурсқа 492 жетім бала, 363 I және II топ мүгедектері, 37 соғыс ардагерлеріне теңестірілгендер санатындағы аби­туриенттер, 1053 ҚР азаматтығы жоқ қазақ ұлты өкілдері қатысады. Оларға квоталар белгіленіп отыр», – деді Е.Сағадиев. Биылғы білім гранттары иегерлерінің есімдері де жыл­дағы дәстүр бойынша бұқаралық ақпарат құ­рал­­дарында жарияланатынын естеріңізге саламыз. Рауан ҚАЙДАР, «Егемен Қазақстан»