Басты мәселе – баспана

Биыл Шымкент қаласында «Нұрлы Жол» бағдарламасы аясында 96 пәтер тапсырылады «Бәйтерек» холдингінің енші­лес ұйымы «Қазақстан Ипотекалық Компаниясы» ИҰ» АҚ – «Нұрлы Жол» аясында жалға берілетін тұр­ғын үй бағдарламасын іске асыратын операторлардың бірі. Қазір компания «Нұрлы Жол» бағ­дарламасы бойынша Шымкент қаласында 96 пәтерден тұратын үйдің құрылысына қатысып жатыр.  Оның жалпы алаңы – 5,4 мың шаршы метр. Пәтерлерді жел­тоқ­санда тапсыру жоспарланып отыр. Олардың барлығы таза әрлен­ген және газ плитасымен жабдық­талады. «Қазақстан Ипотекалық Ком­па­ниясы» ИҰ» АҚ Басқарма төра­ғасының орынбасары Болат Досмұхаметовтің айтуынша, ипо­те­калық компания желісі бойынша жалға берілетін тұрғын үй бағдарламасына қатысушыларды таңдау мен тұрғын үйлерді бөлумен тікелей айналысатын жергілікті атқарушы органдарда кезекте тұрғандар қатыса алады. Бұл үйлер көп балалы отбасылар, толық емес отбасылар, мүгедек балалары бар және оларды  тәрбиелеп отырған отбасыларға беріледі. Со­нымен бірге, жетім балалар, ата-анасының қамқорлығынсыз қал­ған жетім балалар, оралмандар, мемлекеттік қызметкерлер,  әске­ри қызметкерлер, арнайы мем­лекеттік органдардың қыз­мет­керлері, бюджеттік ұйымдардың қыз­мет­керлері де баспанамен қамтамасыз етіледі. Дастан КЕНЖАЛИН, «Егемен Қазақстан»