Фото: Depositphotos.сom
«Қазгидромет» синоптиктері Қазақстан бойынша мамыр айына арналған кеңес сипатындағы ауа райы болжамын жариялады. Оған сәйкес, ел аумағының көп бөлігінде жылы ауа райы сақталып, жауын-шашын мөлшері қалыпты деңгейде болады.
Айдың басында елдің басым бөлігінде ауа райы тұрақсыз сипат алады – жаңбыр жауып, кей жерлерде нөсер, найзағай, бұршақ күтіледі, жел екпіні күшейіп, дауылға ұласуы ықтимал. Мамырдың алғашқы онкүндігінде (1-10 мамыр) батыс, солтүстік және шығыс өңірлерде үсік жүруі мүмкін.
Алғашқы он күнде ауа температурасы өңірлер бойынша мынадай деңгейде құбылады:
– батыста түнде +2…+10 градус, топырақ бетінде +1…+20 градус, күндіз +12…+32 градус;
– солтүстік пен солтүстік-шығыста түнде +3…+8 градус, топырақ бетінде +2…+15 градус, күндіз +13…+31 градус;
– орталық пен шығыста түнде +3…+15 градус, күндіз +20…+33 градус;
– оңтүстікте түнде +8…+20 градус, күндіз +18…+33 градус.
Болжамдар нақтылана түспек: «Қазгидромет» суперкомпьютерді пайдалана бастады
Мамырдың екінші және үшінші онкүндіктерінде батыс, оңтүстік, оңтүстік-шығыс және орталық аймақтарда ең ыстық күндері ауа температурасы +33…+41 градусқа дейін көтеріледі, ал елдің қиыр оңтүстігінде +44 градусқа дейін жетуі мүмкін.
Салқындау күндері түнгі температура +3…+10 градус шамасында болса, күндіз +18…+25 градус аралығында болады.
Солтүстік пен шығыс өңірлерде түнгі ауа температурасы +2…+9 градус аралығында құбылып, кей жерлерде топырақ бетінде +1…+18 градусқа дейін төмендеуі ықтимал. Күндізгі температура +16…+33 градус шамасында сақталады.
