Қазандағы фестивальға қатысады

Өткен жылы Ш.Айманов атындағы «Қазақфильм» АҚ жарыққа шығарған «Құнанбай» фильмі көрерменнен өзінің жоғары бағасын алғаны белгілі. Енді бұл отандық фильм 5 – 11 қыркүйек аралығында Қазан қаласында өтетін XII Қазан халықаралық мұсылман киносы фестиваліне қатыспақ. Аталған конкурсқа қатысуға әлемнің 50 елінің режиссерлері мен продюсерлерінен барлығы 700-ден астам өтініш келіп түсіпті. Алайда, конкурс бағдарламасына 33 мемлекеттің 60-қа тарта деректі, анимациялық және ойын-сауық сипатындағы фильмдері кірген. Қазақстандық фильммен Ресей, Иран, Қытай, Сербия, Біріккен Араб Әмірліктері, Бангладеш, Малайзия секілді елдердің кино туындылары бәсекеге түспек. Бұл күндері көрермендердің назарына конкурстан тыс кең ауқымдағы бағдарламалар да ұсынылады. Мәселен, фестиваль аясында кинематография сала­сының майталмандарымен түрлі шеберлік-сағаттар, байқауға қатысушылармен шығармашылық кездесулер, кино өнері саласының өзекті мәселелеріне арналған дөң­гелек үстелдер мен баспасөз мәс­лихаттары ұйымдастырылады. Конкурстық бағдарламаны режиссер, сценарист, продюсер Сиддик Бармак, режиссер, ки­но­­оператор Усман Сапаров, режис­сер, сценарист Юсуп Ра­зыков және кинооператор Вале­рий Севастьянов бағалайды. Фестивальға төрелік ететін қазылар алқасының төр­ағасы – белгілі кинорежиссер, Ре­сейдің халық әртісі, КСРО Мемле­кеттік сыйлығының лауреаты Александр Прошкин. Бұл фестиваль – 2005 жылдан бері дәстүрлі түрде Татарстан аста­насында ұйымдастырылып ке­ле жатқан ең ауқымды кинокөр­се­тілім. Фестивальдың негізгі тұжы­­рым­дамасы «Үнқатысу мәде­ние­тінен – мәдениет үнқатысуына» ұраны арқылы анық көрініс тапқан. Жалпы, форумның бағдарла­масына ұлтаралық үнқатысу орнатуды өзек еткен, бейбітсүйгіштік, өзге дінге құрметпен қарау, толе­ранттылық секілді идеяларды бас­шылыққа алған фильмдер таңдап алынған. Ләйла ЕДІЛҚЫЗЫ, «Егемен Қазақстан»