Премьер-Министр жұмыс сапарымен Батыс Қазақстанға барды

Мемлекет басшысының тапсырмасымен өңірдің әлеуметтік-экономикалық дамуын бағалау үшін Премьер-Министр Кәрім Мәсімов жұмыс сапарымен Батыс Қазақстан облысына барды. Pm.kz-тің хабарлауынша, Кәрім Мәсімовтің жұмыс сапары бағдарламасында аймақтың еңбек ұжымдарымен және қоғам өкілдерімен кездесуі, инфрақұрылымдық нысандарды, аграрлық-өнеркәсіптік кешен кәсіпорындарын аралауы көзделген. Үкімет басшысы «Нұрлы жол» бағдарламасы аясында жүзеге асырылып жатқан «Орал – Тасқала – РФ шекарасы» автожолдарын қайта жөндеу барысын бағалайтын болады. Аймақтың және жалпы еліміздің көлік-логистикалық жобаларының стратегиялық маңыздылығын ескере отырып, Кәрім Мәсімов Батыс Қазақстан облысындағы автомобиль жолдарының жай-күйі туралы кеңес өткізеді. Сонымен қатар, Премьер-Министр аграрлық-өнеркәсіптік кешен өкілдерімен тамақ өңдеу өнеркәсібінің өзекті бағыттарын талқылап, «Кублей» қалбырларын шығаратын кәсіпорынға барады. Газ саласының өзекті мәселелері мен даму перспективаларын компаниялардың, мемлекеттік органдар мен салалық құрылымдардың басшыларымен кездесу барысында талқылау жоспарлануда. Айдар ӨРІСБАЕВ