Бас прокурор АҚШ елшісімен кездесті

Бүгін Бас прокурор Жақып Асанов АҚШ-тың еліміздегі Төтенше және Өкілетті елшісі Джордж Кролмен кездесті, деп хабарлады Бас прокуратураның баспасөз қызметі. Кездесу барысында Бас прокурор қадағалау органы қызметінің негізгі бағыттары туралы мәлімет берді. Тараптар екі ел арасындағы құқықтық ынтымақтастық бойынша бірқатар мәселелерді талқылады. Соның ішінде, терроризм және экстремизммен күрес, ЭКСПО-2017 көрмесін өткізу барысында қауіпсіздікті қамтамасыз ету, құқық қорғау саласының сарапшыларымен және мамандарымен алмасу, сонымен қатар, екіжақты шарт-құқықтық базаны кеңейту ісіндегі ынтымақтастық мәселелері қамтылды. Жақып Асанов Қазақстанның Бас прокуратурасы құқықтық саладағы сындарлы әрі өзара тиімді диалогқа дайын екенін атап өтті. Қос тарап қол жеткізілген ықпалдастық деңгейін ризашылықпен атап өтіп, қылмыспен күрес жөніндегі екіжақты қарым-қатынасты жандандыру қажеттілігіне назар аударды. Сондай-ақ өзара тиімді ынтымақтастықты дамытуға дайын екендерін білдірді. Айдар ӨРІСБАЕВ