«...Жер сатылады» дегені жалған

Алыпсатарлыққа әбден үйреніп алдық қой. Тіпті, бизнестің өзін бір жер­ден алып, екіншісіне үстеме баға қо­сып сату деп ұғатындар әлі бар. Бірақ бар ғой, мұнай қоры бар кен ор­нын тұтасымен сатамын деген хабар­ландыру оқимыз деген үш ұйық­тасақ түсімізге кірмепті. «Жүре берсең, көре бересің» дейтін тәмсілге сүйенсек, бұдан да зорына куә болатын сияқтымыз. Olx.kz деген сайт бар. Жұрт өзі пайдаланбайтын, бірақ ұстауға жарамды анау-мынау заттарын сонда арзан бағамен саудаға шығарады. Кәкүр-шүкірдің арасынан «Бұрын ешкім бұрғыламаған, мұнайын игермеген кен орнын сатамыз. Бағасы – 8 миллион доллар немесе 2 миллиард 918 миллион 320 мың теңге. Біз өзіміз демеуші іздеп көрдік. Бірақ ешкім табылмады. Сондықтан сату үшін жарнамалап отырмыз. Жер «Құмкөл» тасжолындағы «Казма» компаниясынан 25 шақырым қашықтықта орналасқан. Жердің кенішіне барлау жұмыстары Кеңес Одағының тұсында жүргізілген. Ол кездегі құжаттардың бәрі қолымызда бар. Жер жекеменшік ие­лігінде. Электр қуаты мен су 25 ша­қы­рым қашықтықта. Бастысы, тас­­жол 30 шақырым, теміржол 175 ша­қы­­рым қа­шық­тықта орналас­қан. Са­тып алу­­шы табылып жатса, са­та­мыз, инвес­­тор табылса, ақыл­дасу­ға дайын­быз», деген хабар­лан­дыру­дың жүр­гені жұртты кәдімгідей дүр­лік­тіріп тастады. Жарнама беруші  Рус­там Рыспеков ныс­пылы азамат екен. Бастапқыда, біреудің қалжыңы шығар деген едік. Дегенмен, қажет­ті құжаттарының бәрін тіркеп қойған. Сенбесіңе болмайды. «Жер учаскесіне жекеменшік құқын беретін актінің» көшірмесін де салған. Кен орны орналасқан тұстың картасы да бедерленген. «Мақсат-Мұнай Консалтинг» дейтін мекеменің де құжаттары жүр. Қысқасы, сендік. Сосын облыстық Жер қатынастары басқармасына хабарластық. – Olx.kz сайтында жарияланған «Қызылордада қойнауы мұнайға толы жер сатылады» деген хабарландыруды бірден зерттедік, – дейді басқарма басшысы Шахмардан Қой­шыбаев. – Зерделей келе, ондағы жар­­намаға қойылған ақпараттың шын­­дыққа жанаспайтындығын, әрі жал­­ған екендігін анықтадық. Бірін­ші­­ден, сатуға қойылған жердің 2014 жыл­дың 7 қазанындағы №384 нөмірлі тір­кеудегі жер актісі Сұлтанбек Би­мур­заев деген азаматқа берілгені анық­талды. Ол учаске Сырдария ауда­ны, А.Тоқмағанбетов ауылдық ок­ругі­­нің «Қарасор» аймағынан шаруа қо­жа­лығын жүргізу үшін берілген, яғни ауыл шаруашылығы мақсатына пай­да­лану үшін көзделген. Бұл жерді ны­са­налы пайдалану мақсатының «мұнай өндіруге» мүлде қатысы жоқ. Екін­ші­ден, еліміздің заңнамаларына сәйкес жер учас­кесін мұнай кеніші ретінде пай­да­лану үшін ең алдымен міндетті түрде са­лалық министрлікпен, атап айт­қан­да Энергетика министрлігі бер­ген жер қойнауын пайдалануға қатыс­ты келісімшарт болуы қажет. Ондай келісім болмай аталмыш жерде мұнай өндіруге тыйым салынады. Басқарма басшысы хабарлан­дыру­дың жалған екенін нақты дәлелдермен айтты. Рустам Рыс­пеков­тің мұнай қоры бар кенішті қолма-қол сатамын дегені өтірік болып шықты. Бұл – жарнама берушінің ойыны ма, әлде басқа пиғылы бар ма, оны құзыр­лы орындар анықтауы керек. Мем­ле­кет­тің байлығы саналатын кен орындарын алыпсатарлық сайттар арқылы сату деге­ніңіз адамның күлкісін келтір­ген­мен, намысыңа да тиеді екен. Сондық­тан, бұған бейжай қарауға болмайды. Ержан БАЙТІЛЕС, «Егемен Қазақстан» Қызылорда облысы