Өңіраралық әріптестік әлі де әлсіз

Аймақта өңіраралық коо­перацияны дамыту жөніндегі шаралар Мемлекет басшысының тапсырмасы бойынша 2016 жылдың басынан бері жүргізіліп келеді. Облыс әкімдігі жыл басынан бері Қызылорда, Жамбыл және Оңтүстік Қазақстан облыстарымен өзара ынтымақтастықты нығайту,  өңіраралық байланысты кеңейту туралы меморандумдарға қол қойды. Өзара тиімді тауарлар жеткізу мен тәжірибе алмасу жұмыстары еліміздің өзге облыстарымен де жүріп жатыр. Өңіраралық кооперация жүзеге асырыла бастағалы жақсы көр­сет­кіш­терге қол жеткізілді, әлеуметтік маңызды азық-түлік түрлерін тікелей жеткізудің арқасында баға орташа 10-15 пайызға, жекелеген өнімдерге 40 пайызға дейін төмендеді. Алайда, қазіргі таңда жергілікті тауар өндіру­шілерге және азық-түлік пен өзге тауар түрлеріне бағаны төмендету үшін қолдау көрсетуге бағытталған жобаларды жүзеге асыру қарқыны бәсеңдеген. Өңірде ауданаралық коо­перацияны дамыту да өзекті болып қалуда. Қазіргі таңда бұл бағытта тек Шалқар және Ырғыз аудандары бо­йынша алға жылжу бар, соны­мен бірге, көршілес Қызылорда облы­сы­ның Арал және Қазалы аудандарымен іскер­лік байланыс орнатылуда. Ырғыз ауданында балық зауыты құрылысына қызыл­ордалық кәсіпкер қаржы құйды. Өңіраралық кооперацияны дамыту жұмыстарының қарқыны нашар. Әлі де көрші облыстардың әлеуеті толық пайдаланылмай отыр. Сонымен бірге, тек азық-түлік жеткізу бойынша жұмыстар жасалуда, өңіраралық кооперация экономиканың өзге салаларына  оң ықпалын тигізе алмауда. Мұның барлығы жүйелі жұмыстың болмауынан  қалыптасып отырған жағдай. Жауапты тұлғалардың тарапынан бақылау мен жұмыстарды үйлестіру тиісті деңгейде емес. Өңіраралық байланыстарды дамытудың ең алдымен тұрғындар үшін, сонымен бірге импорт алмастыру тұрғысынан алғанда өңір үшін тиімді екенін өмірдің өзі көрсетіп отыр. Әкімдіктер мен мем­ле­кет­тік орган жетекшілеріне өңір­ара­лық кооперация үлгісін одан әрі дамытып, өнеркәсіп, құрылыс, білім, мәдениет, спорт, туризм және басқа сала­лар­да кеңейтуге бағыт ұстаса ұтым­ды болары сөзсіз. Сатыбалды СӘУІРБАЙ,  «Егемен Қазақстан» Ақтөбе облысы