Асыл тұқымды мал өсіріледі

Оңтүстік Қазақстан облысының ауыл шаруашылығы саласын дамытуда әлеуеті жоғары. Осыны ескерген облыс әкімі Бейбіт Атам­құлов ауылшаруашылық саласын реформалаудың негізгі бес бағыты жүзеге асырылатынын айт­қан болатын. Ондағы бесінші бағыт – әрбір ауда­нды әлеуеті мен кли­мат­тық ерек­шеліктеріне қарай дамы­ту. Яғни, Созақ пен Бәйдібек аудан­дарының мал шаруашылығы саласын ілгерілету. Бүгінде аталған жоспарды жүзеге асыру мақсатында Созақ ауданында бірқатар келіссөздер жүргізіліп, жаңа жобалар жүзеге асуда.  Мәселен, аудан әкімдігі мен уран өндіретін француздық «Арева» компаниясы және қазақ-француз «Катко» БК-мен бірлескен асыл тұқымды мал өсіру, бордақылау және мал өнімдерін өңдейтін «Соз-Агро» корпоративтік қоры құрылды. Құрылтайшысы «Арева НС-Катко-Демеу» болып табылатын корпоративтік қор бизнестің әлеуметтік жауапкершілігі аясында ауданның ауыл шаруашылығы саласына 400 млн. теңге инвес­тиция құйып отыр. Аудандық ауыл шаруашылығы және жер қатынастары бөлімінің басшысы Әбубәкір Сахиұлының айтуынша, аталған корпоративке 300 бас асыл тұқымды ірі қара мен 15 бас асыл тұқымды бұқа алынбақ. «Бүгінде кешеннен мал өрісіне жер бөлініп, мал басын алуға 50 млн. теңге, ал кешен құрылысына 268 млн. теңге  қаржы бөлініп отыр. Және ауыл шаруашылығына қа­жет­ті техникаларға 82 млн. теңге қар­жы жұмсалып, жалпы 50 адам жұмыспен қамтылатын болады», деді Әбубәкір Сахиұлы. Сондай-ақ, «Соз-Агро» корпо­ра­тивтік қоры алдағы уақыт­та Қазақ ұлттық аграрлық универ­ситетінің ғалымдарымен бірлесе отырып, аудан көлемінде ауыл шаруа­шылығын дамытуды көздеп отыр. Эльмира АБДЕЕВА Оңтүстік Қазақстан облысы